13 чэрвеня, ва ўспамін святога Антонія Падуанскага, Старшыня Канферэнцыі Каталіцкіх Біскупаў у Беларусі арцыбіскуп Тадэвуш Кандрусевіч скіраваў віншаванне з імянінамі Апостальскаму нунцыю Антэ Ёзічу.
Ад імя ўсіх беларускіх біскупаў і ад сябе асабіста Мітрапаліт Мінска-Магілёўскі выказаў нядаўна прызначанаму Папам Францішкам ягонаму прадстаўніку ў нашай краіне самыя шчырыя віншаванні. Праз заступніцтва яго нябеснага апекуна святога Антонія кіраўнік беларускага каталіцкага епіскапату пажадаў Антэ Ёзічу шчодрых Божых ласкаў, патрэбных дароў і добрага здароўя для плённага выканання яго новай місіі ў якасці прадстаўніка Святога Айца Францішка ў Беларусі.
«Святы Антоній ушаноўваецца як апякун, які дапамагае знаходзіць страчаныя рэчы. У часы ваяўнічага атэізму людзі ў нас страцілі веру, але сёння зноў яе знаходзяць.
Мы спадзяемся, што вопыт Вашай Эксцэленцыі дапаможа нам у гэтым доўгім і няпростым працэсе ў часы секулярызму і маральнага рэлятывізму», — напісаў у віншаванні арцыбіскуп Тадэвуш Кандрусевіч, запэўніўшы Апостальскага нунцыя Антэ Ёзіча ў братняй малітве за яго біскупаў Касцёла на Беларусі.
