29 мая 65-ю гадавіну прэзбітэрскага пасвячэння адзначае ксёндз прэлат Ежы Лявінскі — шматгадовы выкладчык і выхавацель будучых святароў у Гродзенскай духоўнай семінарыі.
З самага пачатку дзейнасці Вышэйшай духоўнай семінарыі ў Гродне святар з’яўляецца выкладчыкам гэтай навучальнай установы, на працягу некалькіх гадоў выконваў у ёй абавязкі прэфекта. Гродзенская семінарыя стала першай на тэрыторыі сучаснай Беларусі каталіцкай навучальнай установай, дзе пасля савецкага перыяду ганенняў пачалі рыхтаваць будучых святароў для ўсяго мясцовага Касцёла. У нашы дні Гродзенская семінарыя афіцыйна набыла статус міждыяцэзіяльнай.
У студзені гэтага года ксёндз Ежы адзначыў сваё 90-годдзе. Пажылы святар ужо не выкладае, але сваёй прысутнасцю і малітвай духоўна падтрымлівае супольнасць семінарыі. Нягледзячы на салідны ўзрост і праблемы са здароўем, ён штодзённа прысутнічае ў семінарыйнай капліцы на святой Імшы і набажэнствах. Такая трывалая вернасць пакліканню з’яўляецца яскравым сведчаннем і прыкладам для будучых святароў.
Цэлебрацыю святой Імшы падзякі за 65 гадоў святарскага служэння ксяндза Ежы Лявінскага ў капліцы духоўнай семінарыі ўзначаліў Генеральны вікарый Гродзенскай дыяцэзіі біскуп Юзаф Станеўскі.
Разам з іерархам пры алтары маліліся сам дастойны юбіляр, рэктар семінарыі ксёндз Віталь Вайцяхоўскі, прэфект ксёндз Ян Раманоўскі і духоўны айцец ксёндз Ян Сарэла. Свае малітвы за юбіляра ўзносілі да Бога ўсе семінарысты.
У прамоўленым Божым слове біскуп Юзаф Станеўскі адзначыў, што «праз сакрамэнт хросту чалавек становіцца Божым дзіцем, а праз святарскае пасвячэнне — асаблівым спадкаемцам Бога».
«Абвяшчаць Евангелле можна не толькі з амбону. Перадусім прыклад жыцця святара павіннен быць абвяшчэннем Евангелля», — зазначыў іерарх.
65-я гадавіна прэзбітэрскага пасвячэння ксяндза Ежы Лявінскага стала для будучых святароў добрай нагодай паразважаць над дарам і таямніцай Божага паклікання. Яго сведчанне раскрывае глыбокае значэнне словаў Хрыста: «Не вы Мяне выбралі, але Я выбраў вас і прызначыў, каб вы ішлі і прыносілі плён, і каб плён ваш трываў» (Ян 15, 16).
Разам з ксяндзом прэлатам 29 мая гадавіну святарства адзначае і сённяшні рэктар Міждыяцэзіяльнай вышэйшай духоўнай семінарыі ў Гродне ксёндз Віталь Вайцяхоўскі. На гэтым тыдні гадавіны прэзбітэрскага пасвячэння адзначылі таксама эканом семінарыі ксёндз Валерый Аброшка і прэфект ксёндз Ян Раманоўскі.
Ксёндз прэлат Ежы Мар’ян Лявінскі нарадзіўся 2 студзеня 1930 г. у Дзятлаве. У савецкія часы разам з сям’ёй быў вывезены ў Сібір. вярнуўшыся з выгнання, сям’я выехала ў Польшчу. Закончыў духоўную семінарыю ў Сандаміры, дзе 29 мая 1955 г. з рук біскупа Яна Лоркі прыняў святарскае пасвячэнне. Як святар нёс душпастырскае служэнне ў Беларусі, Расіі і Казахстане, дзе ў складаныя часы пераследу абвяшчаў Евангелле, цэлебраваў св. Імшу, спавядаў.
Пасля шасці гадоў душпастырскай працы быў скіраваны на вучобу ў Люблінскі каталіцкі ўніверсітэт, пасля заканчэння якога абараніў дысертацыю па кананічным праве. У 1968–1990 гадах працаваў у дыяцэзіяльнай курыі ў Сандаміры.
З самага пачатку існавання Вышэйшай духоўнай семінарыі ў Гродне з’яўляўся выкладчыкам, а некаторы час прэфектам гэтай духоўнай навучальнай установы.
За заслугі перад Касцёлам быў менаваны Ганаровым капеланам Яго Святасці, канонікам Сандамірскага і Гродзенскага катэдральных капітулаў.
