![](/3/images/news/2020/04/2020-04-01-mihaliszki_34.jpg)
З 27 па 29 сакавіка ў парафіі святога Міхала Арханёла ў Міхалішках (Астравецкі дэканат, Гродзенская дыяцэзія) адбыліся велікапосныя рэкалекцыі, якія для мясцовых вернікаў правёў біскуп Віцебскі Алег Буткевіч.
Як паведаміў партал Grodnensis.by, духоўныя практыкаванні ў прыгожым барочным касцёле на маляўнічым беразе Віліі іерарх правёў па запрашэнні пробашча парафіі ксяндза Анатоля Захарэўскага. Рэкалекцыі сталі для ўдзельнікаў часам ласкі і ўмацавання ў веры.
Парафіяне загадзя рыхтаваліся да гэтай падзеі і маліліся аб патрэбных ласках для біскупа і для ўсіх удзельнікаў, каб сэрца кожнага было адкрыта для дзеяння Божай ласкі. Рэкалекцыяніст зрабіў вялікае ўражанне на вернікаў. Яны адзначылі багацце яго сэрца і душы, жыццёвую мудрасць, адкрытасць, чуласць, даступнасць для кожнага.
Тры дні супольнага разважання над Божым словам, якое было спалучана са штодзённай рэчаіснасцю, сталі для ўдзельнікаў рэкалекцый магчымасцю перажыць духоўнае навяртанне.
У складаны час, калі свет сутыкнуўся з пандэміяй каранавірусу, іерарх дапамог вернікам з Міхалішак у цішыні нанава адкрыць каштоўнасць і непаўторнасць жыцця ў святле Божай праўды.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)