25 сакавіка ў рэктаральным касцёле Звеставання Найсвяцейшай Панне Марыі (пабрыгіцкі) у Гродне, дзе ў гэты дзень адзначалася адпустовая ўрачыстасць, біскуп Гродзенскі Аляксандр Кашкевіч падчас выстаўлення Найсвяцейшага Сакрамэнту прачытаў Акт прысвячэння Беларусі Беззаганнаму Сэрцу Марыі згодна з распараджэннем Старшыні ККББ.
Як паведамляе партал Grodnensis.by, на малітве сабраліся святары, сёстры законныя з Кангрэгацыі Найсвяцейшай Сям’і з Назарэта, якая шмат гадоў апякуецца святыняй, і жыхары горада.
Апоўдні прысутныя з’ядналіся ў малітве словамі, якім навучыў Пан Езус Хрыстус, прамовіўшы разам «Ойча наш».
Потым біскуп удзяліў благаслаўленне Найсвяцейшым Сакрамэнтам прысутным і ўсёй Беларусі, благаслаўляючы на чатыры бакі свету.
Пасля гэтага адбылася святая Імша, цэлебрацыю якой узначаліў біскуп Кашкевіч, просячы аб далучэнні да малітвы ў інтэнцыі спынення эпідэміі каранавірусу, у інтэнцыі хворых, медыцынскіх і санітарных службаў, памерлых і іх сем’яў.
Адначасова іерарх падкрэсліў, што час рэальнай пагрозы жыццю, які перажываецца зараз, мабілізуе да пошуку спосабаў захавання жыцця, а таксама пабуджае да ўзаемнай малітвы.
З нагоды Дня святасці жыцця, які адзначаецца 25 сакавіка, біскуп пажадаў, каб наша ўзіранне ў святасць жыцця перараджалася ў канкрэтныя дзеянні, якія служаць абароне жыцця нашых бліжніх і нас саміх.
На заканчэнне ўрачыстасці рэктар касцёла ксёндз канонік Антоні Грэмза падзякаваў усім за прыбыццё і за супольную малітву.
