5 сакавіка, ў 80-ю гадавіну ганебнага рашэння савецкіх уладаў знішчыць ваеннапалонных Войска польскага, сярод якіх было нямала нашых землякоў, у мінскім катэдральным касцёле Найсвяцейшага Імя Марыі біскуп Юрый Касабуцкі ўзначаліў цэлебрацыю святой Імшы.
Шматлікія ўдзельнікі Эўхарыстыі маліліся аб вечным жыцці для ахвяраў, забітых у лесе каля Катыні.
Сёння гэтая вёска пад Смаленскам вядомая ва ўсім свеце. 80 гадоў таму савецкія каты расстрэльвалі тут ваеннапалонных Войска польскага, захопленых у верасні 1939 года.
Сярод забітых былі людзі розных нацыянальнасцяў і веравызнанняў, таму ўшанаваць іх памяць у галоўнай каталіцкай святыні Мінска сабраліся Пасол Польшчы ў Беларусі Артур Міхальскі, дыпламаты з розных краін, а таксама прадстаўнікі Беларускай Праваслаўнай Царквы, юдэйскай і мусульманскай супольнасцяў.
Падчас супольнай малітвы Генеральны вікарый Мінска-Магілёўскай архідыяцэзіі біскуп Юрый Касабуцкі благаславіў абраз Маці Божай Катынскай, які з гэтага часу будзе захоўвацца ў мінскай катэдры.
«Няхай гэтая ікона будзе для нас бачным знакам прысутнасці Бога ў нашым жыцці. Найсвяцейшая Маці заўсёды з намі, заўсёды туліць нас да свайго сэрца, калі нам кепска і складана», — адзначыў пры гэтым іерарх.
