![](/3/images/news/2020/03/2020-03-03-kazimir_katedra_31.jpg)
1 сакавіка ў катэдральнай базыліцы святога Францішка Ксавэрыя ў Гродне быў урачыста адкрыты барэльеф з выяваю святога Казіміра, які благаславіў Гродзенскі біскуп Аляксандр Кашкевіч.
Барэльеф у гонар святога апекуна моладзі, чый кароткі зямны шлях завяршыўся 4 сакавіка 1484 года ў горадзе на Нёмане, быў адкрыты з нагоды набліжэння свята гэтага святога, які з’яўляецца таксама адным з апекуноў Гродзенскай дыяцэзіі.
![](/3/images/news/2020/03/2020-03-03-kazimir_katedra_42.jpg)
Як паведаміў партал Grodnensis.by, на святой Імшы з нагоды адкрыцця барэльефу сабраліся шматлікія жыхары Гродна і госці.
У гаміліі ў першую нядзелю Вялікага посту біскуп Кашкевіч падкрэсліў, што важны элемент у падрыхтоўцы да велікодных святаў — вучыцца ўмацоўваць сваю волю ў барацьбе са спакусамі.
Іерарх заахвоціў удзельнікаў літургіі стаць на шлях навяртання. Па яго словах, дапамогай, калі ёсць крыху добрай волі, можа стаць больш частая і працяглая малітва, чытанне Святога Пісання, адкрытасць для людзей, якім патрэбна дапамога; для тых, якія часта побач з намі і маюць патрэбу ў наведванні, дапамозе, падтрымцы, добрым слове…
Пастыр Касцёла на Гродзеншчыне адзначыў, што трэба кожны дзень аднаўляць свой выбар быць хрысціянінам і адводзіць Богу першае месца, каб супрацьстаяць спакусам, якія пастаянна прапануе секулярызаваная культура.
Біскуп дадаў, што, сутыкаючыся са шматлікімі выклікамі, якія стаяць перад сучасным чалавекам, належыць узірацца ў асобу святога Казіміра, які найперш давяраў Хрысту і, нягледзячы на раскошу каралеўскага двара, палітычныя інтрыгі, ілюзію багацця і ўлады, стаў «убогім у духу», «ціхім», «тым, які прагне справядлівасці», «міласэрным», «чыстым сэрцам», «тым, які нясе супакой», «церпячым пераслед за справядлівасць».
Іерарх выказаў надзею на тое, што выява святога Казіміра ў гродзенскай катэдры будзе нагадваць усім, хто ўваходзіць у святыню, прыгожыя цноты маладога каралевіча, а таксама яго шлях да дасканаласці.
Біскуп пажадаў усім прысутным па прыкладзе гэтага святога «ўскласці на Бога ўсю сваю надзею і жыць Божым словам, служыць Пану Богу і так стаць годнымі магутнай перамогі дабра над злом».
![](/3/images/news/2020/03/2020-03-03-kazimir_katedra_58.jpg)
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)