З 3 па 8 сакавіка ў Вільні пройдуць урачыстасці ў гонар Апекуна Літвы і моладзі святога Казіміра — Казюкі.
У межах сёлетніх урачыстасцяў у віленскай катэдральнай базыліцы святога Станіслава і святога Уладзіслава, дзе з пашанаю захоўваюцца рэліквіі святога Казіміра, будзе цэлебравацца святая Імша на беларускай мове.
Эўхарыстыю пры рэліквіях святога, чый кароткі зямны шлях завяршыўся 4 сакавіка 1484 года ў Гродне, будзе цэлебраваць пробашч віленскай парафіі святога Барталамея на Зарэччы брат Арыюш Пётр Малыска OFMCap, адказны за душпастырства беларусаў у Вільні.
Святая Імша на беларускай мове ў віленскай катэдры адбудзецца ў суботу 7 сакавіка ў 11.15.
Акрамя набажэнстваў, у гэты час у Вільні будзе праходзіць славуты кірмаш, на якім можна набыць традыцыйныя для Віленскага краю вербы і іншыя вырабы майстроў народных рамёстваў.
