17 лютага стала вядома, што ў Гродне пасведчанне аб дзяржаўнай рэгістрацыі атрымала яшчэ адна каталіцкая парафія пад тытулам святога айца Піо з П’етрэльчыны.
Як паведаміў партал Grodnensis.by, пасведчанне было падпісана ў Сусветны дзень хворых, які адзначаецца 11 лютага.
Новая парафія ахоплівае мікрараён Грандзічы-2, гарадскую частку Забалаці і прылеглыя вёскі.
Апекуном супольнасці абраны італьянскі капуцын, стыгматык і святы Каталіцкага Касцёла айцец Піо з П’етрэльчыны (1887–1968), які здзівіў увесь свет сваім незвычайным жыццём і гарачай верай.
Крыж Збаўцы стаў для яго школай святарства і крыніцай любові да людзей, якіх ён спавядаў, аздараўляў і суцяшаў. Касцёл успамінае яго 23 верасня.
Згодна з рашэннем біскупа Гродзенскага Аляксандра Кашкевіча, пробашчам новай парафіі прызначаны ксёндз Артур Малафей, які быў вікарыем парафіi Найсвяцейшай Панны Марыі Вастрабрамскай Маці Міласэрнасці (Аўгустовак) у Гродне i з’яўляецца адказным за душпастырства спорту і фізічнага выхавання Гродзенскай дыяцэзіі.
