3 лютага міністр замежных спраў Беларусі Уладзімір Макей і яго літоўскі калега Лінас Лінкявічус наведалі касцёл Найсвяцейшай Тройцы ў Гервятах.
Як паведаміў партал Grodnensis.by, наведванне святыні адбылося падчас афіцыйнага двухдзённага візіту літоўскага міністра ў Беларусь.
Пробашч парафіі ў Гервятах ксёндз Эліяс Маркаўскас пазнаёміў гасцей з багатай гісторыяй неагатычнага касцёла, які называюць «беларускім Нотр-Дамам».
Міністры ўсклалі кветкі на месцы пахавання ксяндза Леаніда Несцюка, шматгадовага пробашча парафіі, намаганнямі якога была адноўлена велічная святыня і ўпарадкавана прылеглая тэрыторыя.
Высокія госці зрабілі запіс у парафіяльнай памятнай кнізе.
Лінас Лінкявічус пакінуў у гервяцкім касцёле вотум удзячнасці Богу, які будзе змешчаны пры абразе Найсвяцейшай Тройцы, які лічыцца цудатворным.
