1 лютага, напярэдадні свята Ахвяравання Пана, семінарысты, якія ўвосень распачалі ў Мінску шматгадовы шлях святарскай фармацыі, наведалі Нацыянальны санктуарый Маці Божай Будслаўскай, каб падзякаваць Богу і Найсвяцейшай Панне Марыі за паспяхова здадзеную экзаменацыйную сесію — першую ў іх семінарыйным жыцці.
Сваіх выхаванцаў у пілігрымцы падзякі суправаджалі адказныя фарматары: ксёндз Павел Эйсмант, куратар падрыхтоўчага курса, і ксёндз Алег Пятрашка, духоўны айцец.
У першую суботу месяца — дзень, асаблівым чынам прысвечаны Багародзіцы, — у Нацыянальным санктуарыі заўсёды ёсць пілігрымы.
Для ўсіх, хто напярэдадні свята Маці Божай Грамнічнай прыехаў у Будслаў, перад цудатворным абразом адбылася святая Імша, цэлебрацыю якой узначаліў ксёндз Павел Эйсмант.
Божае слова падчас літургіі прамовіў пробашч будслаўскай парафіі ксёндз Дзмітрый Дубовік. У гаміліі святар звярнуў увагу на тое, што ў будслаўскай базыліцы ёсць нямала двухбаковых абразоў. На адным з іх з аднаго боку змешчана жудасная выява смерці — няўхільнага канца існавання ўсяго жывога. Смуткам і безнадзейнасцю так і патыхае ад малюнка касцяка з касою.
«Аднак з адваротнага боку на тым самым палатне мы бачым выяву Уваскрослага Хрыста — Пераможцы смерці», — адзначыў будслаўскі пробашч. Ён дадаў, што старажытны мастак такім чынам хацеў паказаць нябачную рэчаіснасць, якая складае сутнасць хрысціянскай надзеі.
Пасля Эўхарыстыі семінарысты ўзялі ўдзел у адарацыі Найсвяцейшага Сакрамэнту і малітве Фацімскага Ружанцу.
Пасля смачнага абеду, якім пачаставаў сваіх гасцей будслаўскі пробашч і яго шчодрыя парафіяне, ён зноў запрасіў семінарыстаў і іх настаяцеляў у святыню.
Ксёндз Дзмітрый распавёў будучым святарам шмат цікавага пра Нацыянальны санктуарый у Будславе — цэнтральнае месца марыйнага культу ў нашай краіне.
На заканчэнне знаёмства са святыняй семінарысты мелі магчымасць падняцца да цудадзейнага абраза, каб зблізку, сам-насам у ціхай малітве сэрца даручыць Багародзіцы сваё пакліканне і ўвесь свой жыццёвы шлях.
