8 студзеня ў Віцебскім дзяржаўным універсітэце імя Пятра Машэрава прайшоў конкурс жывых батлеек — калядных сцэнак у выкананні дзяцей і моладзі.
Як паведаміў сайт санктуарыя Маці Божай Валадаркі Азёраў у Браславе Waladarka.by, першае месца сярод васьмі ўдзельнікаў сёлета занялі маленькія акторы з браслаўскай парафіі.
Дзеці пад кіраўніцтвам Алены Каспаровіч і сястры Ірыны Папакуль SJE падрыхтавалі спектакль «Ключы ад Брамы Неба».
Па выніках выступаў журы прысудзіла браслаўскай парафіі першае месца, а Максім Кезік за ролю Цара быў адзначаны дыпломам за выканаўчае майстэрства.
Пастаноўку, якая перамагла на дыяцэзіяльным конкурсе, вернікі браслаўскай парафіі мелі магчымасць убачыць першымі.
Артыстызм дзяцей і глыбокі сэнс спектакля не пакінулі абыякавымі браслаўчан і закранулі сэрцы членаў журы.
Конкурс батлеек з’яўляецца не столькі спаборніцтвам, колькі праслаўленнем нованароджанага Збаўцы і дапамагае глыбей перажыць сэнс збаўчых святаў Уцелаўлення Божага Слова.
