24 і 25 снежня Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB узначаліў урачыстыя цэлебрацыі ў катэдральным касцёле Унебаўзяцця Найсвяцейшай Панны Марыі і святога Станіслава.
Ва ўрачыстых набажэнствах удзельнічалі пробашч катэдральнай парафіі кс. Віталій Маргуноў, кансэкраваныя асобы, шматлікія вернікі, у тым ліку дзеці і моладзь.
У прамоўленым на Імшы Пастэрцы Божым слове біскуп Яшэўскі падкрэсліў, што ва ўрачыстасць Божага Нараджэння вернікі пакліканы вучыцца ў Бога пакоры.
«Той, без каго мы не маглі б дзейнічаць, не маглі б жыць, не маглі б рухацца, уцелавіўся, і сёння паказвае сябе як дзіця, якое ляжыць у яслях. Якая пакора!
Якая глыбокая навука для нас, якія з’яўляемся грэшнікамі», — зазначыў ён.
«Сёння кожнаму неабходна падзякаваць добраму Богу, які даў нам ласку быць ахрышчанымі, і пацвярджаць гэтую ласку хросту ў сваім жыцці, — дадаў іерарх. — Заахвочваю сёння прасіць у Яго ласкі быць з Ім, як Дзева Марыя, як святы Юзаф. Давайце будзем жыць гэтым з’яднаннем з Панам Езусам Хрыстом, асабліва ў Святой Эўхарыстыі».
Біскуп заклікаў вернікаў «не змарнаваць гэтага цудоўнага і радаснага свята, а зрабіць усё ад нас залежнае, каб Езус у гэтым годзе сапраўды нарадзіўся сярод нас праз любоў: любоў у нашым доме і сям’і, праз павагу да суседзяў, праз дабрыню і добразычлівасць, праяўленую ўсім, каго сустрэнем у гэтыя радасныя дні».
«Толькі тады будзе сапраўднае Божае нараджэнне, калі з нараджэннем Божага Дзіцяткі мы самі перажывем маленькі цуд любові», — падкрэсліў ён.
У дзень урачыстасці Нараджэння Пана Біскупскі вікарый Магілёўшчыны заклікаў вернікаў браць прыклад любові і самаахвярнага служэння Богу ў святых Марыі і Юзафа.
«Свята Божага Нараджэння — гэта тое свята, што асабліва нагадвае нам прыйсце Езуса ў Бэтлеем і дае нам захапляльную навуку. Бо калі наш Пан прыйдзе на нябесных аблоках, Ён спытае ў нас: Што вы зрабілі з усім, што Я зрабіў для вас? Як вы прымалі Мяне падчас вашай пілігрымкі на зямлі? Як вы прымалі Мяне ў маіх пасланнях? Як вы прымалі Маіх апосталаў? Як вы прымалі Маю Ахвяру, Мае сакрамэнты? І якім будзе наш адказ?
Няхай ён будзе, дарагія мае браты і сёстры, адказам, што раней далі Найсвяцейшая Панна Марыя і святы Юзаф», — пажадаў іерарх.
Біскуп запрасіў вернікаў таксама паразважаць над пытаннямі:
«Ці сапраўды мы прынялі Езуса? Ці сапраўды жывем з Езусам? Ці сапраўды клапоцімся пра выратаванне нашай душы? Таму што менавіта для гэтага Езус прыйшоў у наш свет у постаці чалавека», — нагадаў пастыр.
На заканчэнне ён заахвоціў удзельнікаў урачыстасці зрабіць усё магчымае, каб усе людзі зноў пазналі Езуса і прымалі Яго, як Багародзіца, як святы Юзаф і як пастушкі. Біскуп Аляксандр Яшэўскі SDB завяршыў гамілію благаслаўленнем вернікаў на плённае сведчанне веры.
