19 снежня супольнасць Вышэйшай духоўнай семінарыі імя св. Тамаша Аквінскага ў Пінску сабралася на традыцыйную аплаткавую сустрэчу.
Падобныя сустрэчы сталі ўжо традыцыйнымі напярэдадні выезду семінарыстаў на калядныя канікулы ў родныя парафіі. Сёлета перадкалядная вечарына сабрала фарматараў, выкладчыкаў, працаўнікоў і сяброў семінарыі.
Сустрэча пачалася святой Імшой, цэлебрацыю якой узначаліў біскуп Пінскі Антоні Дзям’янка.
У гаміліі ардынарый засяродзіўся на паняцці святасці і на прыкладзе Слугі Божага Аляксандра Зянкевіча, даваеннага выпускніка пінскай Alma Mater, паказаў, што дасягненне святасці магчымае для кожнага.
Пасля супольнай Эўхарыстыі госці паслухалі Евангелле аб Нараджэнні Езуса Хрыста і падзяліліся аплаткай, выказаўшы ўзаемныя пажаданні.
На заканчэнне сустрэчы біскуп Дзям’янка выказаў падзяку фарматарам і працаўнікам семінарыі за нялёгкі труд выхавання студэнтаў, падтрымку і павагу. Семінарыстам жа іерарх пажадаў плённага перажывання святаў Божага Нараджэння і сіл для служэння ў родных парафіях падчас канікул, а таксама ўдзяліў усім прысутным пастырскае благаслаўленне.
