Пошук


10.12.2019 14:41   Тэкст і фота: Ганна Бычынская / Catholic.by

8 снежня адбылося благаслаўленне памяшкання моладзевага цэнтра пры касцёле ў Стоўбцах — будучага араторыя святога Казіміра.

Пасля святой Імшы пробашч стаўбцоўскай парафіі ксёндз Ігар Лашук запрасіў вернікаў у памяшканне будучага цэнтра, дзе зроблены грунтоўны рамонт. Пасля агульнай малітвы святар акрапіў яго, а прысутныя змаглі агледзець пакоі.

«Араторый — месца сустрэчы маладых людзей.

Гэта своеасаблівы дом, які дае прытулак, касцёл, які евангелізуе, школа, якая рыхтуе да жыцця, асяроддзе, дзе сустракаюцца і жывуць у радасці сябры, — патлумачыў гэтую назву ксёндз Ігар. — Святы Ян Боско, які нарадзіўся ў 1815 годзе ў Італіі і дзяцінства якога прайшло ў вялікай беднасці, калі стаў святаром, усё жыццё прысвяціў выхаванню хлопцаў з самых бедных сем’яў. Для іх ён і ствараў свае славутыя араторыі».

Ян Боско быў цудоўным педагогам і таленавітым выхавацелем. Ён заснаваў закон ксяндзоў салезіянаў і супольнасць Дачок Марыі Дапаможніцы разам са святой Марыяй Дамінікай Мадзарэла для навучання і выхавання моладзі. Ён жа стаў заснавальнікам многіх шпіталяў, дамоў апекі і прафесійных навучальных устаноў. Памёр Дон Боско ў 1888 годзе, а ў 1934 быў кананізаваны. Гэты святы з’яўляецца апекуном моладзі і каталіцкіх выдавецтваў.

Араторый будзе названы ў гонар святога Казіміра, тытул якога мае і касцёл у Стоўбцах. Казімір — другі з шасці сыноў караля Рэчы Паспалітай Казіміра Ягелончыка.

Ён нарадзіўся ў 1458 годзе ў Кракаве. Яго бацькі былі вельмі пабожнымі людзьмі. Казімір таксама вылучаўся надзвычайнай пабожнасцю: штодзённа ўдзельнічаў у святой Імшы, шмат маліўся, здзяйсняў учынкі міласэрнасці.

«Ян Боско — сама актыўнасць. Святы Казімір — нястомная малітва. Спалучэнне гэтых двух паняццяў і будзе мэтай нашага моладзевага цэнтра.

Галоўнае — быць з моладдзю і з Богам, — адзначыў кс. Ігар Лашук. — Гэтае памяшканне — толькі пачатак. Пасля ўзвядзення будынка касцёла ўся капліца будзе аддадзена пад араторый. На дадзеным этапе з мінскімі салезіянамі ёсць дамоўленасць аб падрыхтоўцы кандыдатаў у аніматары. Запрашаем жадаючых».

Абноўлена 10.12.2019 14:59
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Дух хоча жыць у нас –
мы пакліканы да вечнага жыцця