У магілёўскай парафіі Унебаўзяцця Найсвяцейшай Панны Марыі і св. Станіслава адбыўся фестываль «Non Nobis, Domine». Свята было прысвечана ўспаміну святой Цэцыліі, апякункі касцёльнай музыкі, і аб’яднала спевакоў і музыкантаў з усіх магілёўскіх парафій.
Фестываль распачаўся святой Імшой, цэлебрацыю якой узначаліў Біскупскі вікарый для г. Магілёва і Магілёўскай вобласці біскуп Аляксандр Яшэўскі SDB. Іерарх нагадаў, што святая Цэцылія — мучаніца. Яе катавалі, але яна не адраклася ад сваёй веры.
«Сёння мы праслаўляем мучаніцу, святую Цэцылію, якая не вагалася аддаць сваё жыццё за Езуса. За тое, што яна Яго вучаніца. І хоць магла адрачыся, <…> яна гэтага не ўчыніла. Кожнаму трэба прыняць для сябе рашэнне: каго мы хочам слухаць і ў што жадаем услухоўвацца. І маліцца, каб наш выбар быў мудры. Так, як выбар святой Цэцыліі», — сказаў біскуп.
Пасля Імшы распачаўся канцэрт парафіяльных музыкаў Магілёва.
Сярод кампазіцый, якія прагучалі падчас канцэрту, былі як класічныя творы ў выкананні мужчынскага хору «Felix Anima» і арганіста Яўгена Заxaрава, так і песні праслаўлення ў выкананні дзіцячага і моладзевага ансамбляў.
Падарункам для прысутных сталі і выступ жаночага хору «Totus Tuus», і сямейны дуэт Анастасіі і Дзяніса Раманавых. Слухачоў не пакінулі абыякавымі самыя маленькія музыкі — Ян і Марыя Валаховічы, якія выканалі песню «Маці».
Напрыканцы канцэрту ўсе касцёльныя музыкі выканалі кампазіцыю «Не нам, Пане». Яна была абрана невыпадкова, бо сугучная з назвай сёлетняга фестывалю.
Свята завяршылася сустрэчай музыкаў, падчас якой яны змаглі патанчыць, пачаставацца і падзяліцца ўражаннямі ад канцэрту.
