21 кастрычніка, у 105-ю гадавіну нараджэння першага і адзінага кардынала ў сучаснай гісторыі Беларусі, у пінскім катэдральным касцёле Унебаўзяцця Найсвяцейшай Панны Марыі маліліся аб вечным жыцці для яго.
Цэлебрацыю святой Імшы ўзначаліў ксёндз Андрэй Рылка, рэктар адроджанай кардыналам Свёнткам духоўнай семінарыі імя святога Тамаша Аквінскага і канцлер курыі Пінскай дыяцэзіі.
Гамілію прамовіў духоўны айцец семінарыі Аркадзь Куляха OCD, які блізка ведаў кардынала.
У Эўхарыстыі бралі ўдзел выкладчыкі і выхаваўцы семінарыі ў Пінску, а таксама вернікі катэдральнай парафіі.
Цэлебрацыя завяршылася супольнаю малітваю ў крыпце галоўнай святыні Пінскай дыяцэзіі, дзе пахаваны Сведка веры і вялікі пастыр кардынал Казімір Свёнтэк, памяць пра якога жыве ў сэрцах удзячных вернікаў і яго духоўных нашчадкаў.
Уваход у крыпту знаходзіцца з боку вуліцы горада на Піне, якая носіць імя Казіміра Свёнтка.
