29 верасня ў Багданаве (Валожынскі дэканат) адбылася парафіяльная ўрачыстасць у гонар апекуна парафіі святога Арханёла Міхала, падчас якой біскуп Аляксандр Яшэўскі ўдзяліў сакрамэнт канфірмацыі групе мясцовых вернікаў.
Сёлетні парафіяльны адпуст у Багданаве стаў першым фэстам з новым пробашчам, якім нядаўна быў прызначаны ксёндз Павел Беразун.
Малады душпастыр годна працягнуў справу свайго вопытнага папярэдніка, ксяндза Ігара Лашука, які шмат сэрца і працы ўклаў у новы багданаўскі касцёл, пабудаваны напрыканцы мінулага стагоддзя на месцы старога, драўлянага, што сёння можна ўбачыць толькі на бессмяротным палатне Фердынанда Рушчыца «Ля касцёла».
Новы пробашч за няпоўны год служэння ў багданаўскай парафіі падрыхтаваў групу вернікаў з 23-х чалавек рознага ўзросту да прыняцця сакрамэнту хрысціянскай сталасці.
Традыцыйна ў Касцёле гэты сакрамэнт удзяляе біскуп. Таму ў парафіяльную ўрачыстасць святога Арханёла Міхала мясцовыя вернікі сустракалі ў сваёй святыні дарагога госця — Біскупскага вікарыя для горада Магілёва і Магілёўскай вобласці біскупа Аляксандра Яшэўскага SDB.
Іерарх узначаліў цэлебрацыю адпустовай святой Імшы.
У прамоўленай гаміліі ён заклікаў вернікаў, перадусім кандыдатаў да канфірімацыі, на ўзор святога Арханёла Міхала, чыё імя азначае «хто як Бог», заўсёды ставіць Бога на першае месца ў сваім жыцці, каб усё астатняе было ў ім на сваім месцы.
Верна трымацца правільнай іерархіі каштоўнасцяў дапамагае хрысціяніну Дух Святы, які ўмацоўвае яго звышнатуральнаю ласкаю сваіх сямі дароў.
Дары Святога Духа, які ў дзень Пяцідзесятніцы сышоў на Апосталаў у выглядзе языкоў полымя, былі пералічаныя на прыгожай дэкарацыі перад алтаром.
Невыпадкова ва ўрачыстасць апекуна Касцёла на Беларусі і багданаўскай парафіі некалькі маладых людзей выбралі сабе на канфірмацыю імя Міхал.
Новаканфірмаваным біскуп Яшэўскі пажадаў, каб так, як самалётам кіруюць два пілоты, таксама і іх жыццёвым «палётам» кіравалі два пілоты — розум і Дух Святы.
У святочны дзень Багданава, гэтую маляўнічую вёсачку на Валожыншчыне, наведаў не толькі біскуп.
Шматлікія госці падзялілі з тутэйшымі вернікамі іх радасць, а моладзевы хор са сталічнай парафіі Найсвяцейшай Тройцы (святога Роха) на Залатой Горцы аздобіў літургію прыгожым і радасным спевам.
На заканэчнне ўрачыстасці багданаўскія вернікі падзякавалі іерарху за супольную малітву і ўдзелены сакрамэнт, а таксама паабяцалі яму маліцца за даручаны яго асаблівай пастырскай апецы Касцёл на Магілёшчыне, які асабліва пацярпеў у часы савецкага пераследу і ганення на веру.
Прадстаўнікі старэйшага пакалення, якія збераглі дар веры і перадалі яго сваім нашчадкам, шчыра віншавалі сваіх унукаў, умацаваных дарам Святога Духа, жадалі ім Божай апекі і заступніцтва святых Анёлаў.
Жывучы па-хрысціянску і носячы падараваны бабуляй крыжык або медалік, малады чалавек становіцца сведкам Хрыста сярод сваіх аднагодкаў.
Менавіта такія пасланцы Божага Валадарства, нібы Анёлы сярод людзей, патрэбныя сёння Хрысту ў сучасным свеце.
