2 мая ў Багданаве (Валожынскі раён), месцы нараджэння Фердынанда Рушчыца, побач з тутэйшым касцёлам святога Міхала Арханёла быў адкрыты помнік славутаму мастаку.
Як паведамляе на сваім сайце instytutpolski.pl Польскі інстытут у Мінску, аўтарам бюста з’яўляецца вядомы беларускі скульптар Валяр’ян Янушкевіч, чые працы можна ўбачыць у многіх беларускіх касцёлах.
Праект па ўшанаванні памяці беларускага мастака Фердынанда Рушчыца, чый 150-гадовы юбілей адзначаўся летась, быў фінансаваны Пасольствам Рэспублікі Польшча пры падтрымцы Польскага інстытута ў Мінску.
Урачыстая цырымонія з удзелам пробашча багданаўскай парафіі ксяндза Паўла Беразуна адбылася ў прысутнасці прадстаўнікоў Пасольства Рэспублікі Польшча ў Мінску, Польскага інстытута і мясцовай грамадскасці.
Адным з найбольш вядомых мастацкіх твораў Фердынанда Рушчыца з’яўлецца палатно «Нядзеля. Ля касцёла», што захоўваецца ў Нацыянальным мастацкім музеі Рэспублікі Беларусь. На карціне адлюстравана нядзельнае набажэнства ў старым драўляным касцёле ў Багданаве, які згарэў у гады Другой сусветнай вайны.
