26 верасня Вышэйшая духоўная семінарыя імя св. Тамаша Аквінскага ў Пінску ў 19-ы раз пасля яе адраджэння кардыналам Казімірам Свёнткам сабрала сваіх студэнтаў, выкладчыкаў, выпускнікоў, шматлікіх гасцей на інаўгурацыю новага навучальнага года.
На пачатку ўрачыстай сустрэчы ў актавай зале імя заснавальніка семінарыі біскупа Зыгмунта Лазінскага рэктар семінарыі кс. Андрэй Рылка прывітаў сабраных і нагадаў пра слаўныя старонкі гісторыі гэтай духоўнай установы. Перад сабранымі выступіў прэфект і выкладчык пастаральнай тэалогіі ў семінарыі кс. Юрый Пракапюк, як прачытаў лекцыю на тэму «Сакрамэнтальнасць Божага Слова». Біскуп Пінскі Антоні Дзям’янка ўручыў студэнцкі білет семінарысту першага курса, які паходзіць з Пінскай дыяцэзіі.
Цэнтральным момантам святкавання распачацця навучальнага года стала святая Імша ў пінскай катэдральнай базыліцы.
Цэлебрацыю ўрачыстай літургіі ўзначаліў дапаможны біскуп Пінскай дыяцэзіі Казімір Велікаселец, які сёлета адзначае круглыя даты святарскага і біскупскага служэння. З гаміліяй да вернікаў звярнуўся біскуп Антоні Дзям’янка. Іерарх заклікаў сабраных семінарыстаў і святароў яшчэ раз узяць да сэрца прыклад Хрыста — Добрага Пастыра.
«Можна сваё жыццё ахвяраваць камусьці і аддаць яго ў адным геройскім чыне, — адзначыў біскуп. — Можна пайсці за кагосьці на смерць, як гэта зрабіў у Асвенцыме св. Максімільян Кольбэ ці ў Янаве Палескім першы рэктар Пінскай духоўнай семінарыі кс. Вітальд Івіцкі. Аднак неабходна сваё жыццё ахвяраваць за іншых і для іх духоўнага дабра, дзень пры дні».
Іерарх дадаў, што святар — пастыр даверанага яму Божага народа, а Вярхоўным Пастырам з’яўляецца Езус Хрыстус.
«Без жывой і моцнай камуніі з Езусам, Добрым Пастырам, душпастыры ў Касцёле хутка стамляюцца. Прыходзіць стомленасць прафесіяй, страта апостальскай руплівасці і дынамізму.
Надыходзіць пустата. І тады падобны такі пастыр да бусла са зламаным крылом», — заўважыў біскуп.
«Мы маем у нашай дыяцэзіі прыгожы прыклад самаадданага і сапраўднага пастыра Касцёла — слугу Божага біскупа Зыгмунта Лазінскага, заснавальніка нашай духоўнай семінарыі. Няхай яго прыклад жыцця і душпастырства паслужыць для нас заахвочваннем да такога ж, як у яго, служэння — бескарыслівага і ахвярнага», — дадаў іерарх і пажадаў семінарыстам, каб іх прабыванне ў гэтай навучальнай установе «было часам уважлівага слухання рытму сэрца Бога і служэння іншаму чалавеку па прыкладу вялікіх і самаадданых пастыраў Хрыстовага Касцёла».
На заканчэнне літургіі ўсе ўдзельнікі памаліліся аб хутчэйшай беатыфікацыі заснавальніка семінарыі слугі Божага біскупа Зыгмунта Лазінскага, а таксама ўзнеслі малітву ў катэдральнай крыпце, дзе пахаваны аднавіцель семінарыі кардынал Казімір Свёнтэк.
На заканчэнне святкавання біскуп Антоні Дзям’янка падзякаваў усім сабраным за супольную малітву. Асабліва ён падзякаваў святарам і кансэкраваным асобам за сведчанне іх веры і ахвярнага служэння. Біскуп заклікаў усіх вернікаў маліцца за семінарыстаў, а таксама аб новых пакліканнях да святарскага служэння ў Касцёле на Беларусі.
