Як паведамляе партал Catholicnews.by, адкрыццё памятнага знаку, усталяванага на сцяне касцёла Унебаўзяцця Найсвяцейшай Панны Марыі ў Мёрах (Віцебская дыяцэзія), адбылося ў нядзелю, 1 верасня.
Менавіта ў гэты дзень 80 гадоў таму распачалася Другая сусветная вайна, якая забрала жыцці больш як 55 мільёнаў чалавек.
Шмат хто з нашых землякоў змагаўся з нацыстамі не толькі на ўсходнім фронце, але і на Захадзе. Доўгі час пра іх або наогул не ўспаміналі, або лічылі здраднікамі. Шмат хто з іх пацярпеў ад савецкай улады, калі вяртаўся на родную зямлю.
Але настаў час аднавіць гістарычную справядлівасць і годна ўшанаваць памяць гэтых людзей.
Менавіта гэтым кіраваліся нашчадкі ветэранаў Арміі Андэрса з Мёршчыны Аляксандр Рынкевіч, Павел Лутохін і Арцём Сухойда, чые дзяды і прадзеды ваявалі на Заходнім фронце і ўдзельнічалі ў бітве пад Монтэ-Касіна.
У цырымоніі адкрыцця мемарыяльнай дошкі ўзялі ўдзел вернікі, святары, прадстаўнікі мясцовай дзяржаўнай улады і грамадскіх арганізацый, а таксама польскай дыпламатычнай місіі ў нашай краіне.
Патомкі ветэранаў пад апладысменты прысутных знялі тканіну з памятнай шыльды, і ўсе змаглі прачытаць напісаныя на ёй словы:
Мемарыяльная дошка ў гонар воінаў-землякоў, якія ваявалі супраць нямецкіх захопнікаў у складзе Арміі генерала У. Андэрса і іншых баявых злучэннях на Заходнім фронце (1939–1945 гг.).
З кароткім словам да прысутных звярнуўся таксама пробашч Мёрскай парафіі кс. Андрэй Кулік, які нагадаў словы Хрыста: «Няма большай любові, калі хтосьці аддае жыццё за сяброў сваіх».
«Гэтыя людзі аддалі жыццё за свае сем’і, за сваю краіну, за свой народ, і мы павінны пра іх памятаць», — падкрэсліў святар, пасля чаго благаславіў памятны знак на сцяне святыні. Цырымонія завяршылася ўскладаннем кветак і запальваннем знічоў, а затым удзельнікі скіраваліся ў касцёл на святую Імшу.
