![](/3/images/news/2019/09/2019-09-03-_ruszlewicz_sluby_29.jpg)
28 жніўня ў Кракаве (Польшча) семінарыст з Беларусі Віктар Рушлевіч прынёс вечныя манаскія абяцанні ў Ордэне рэгулярных латэранскіх канонікаў, паведамляе партал Grodnensis.by.
Літургічны ўспамін святога Аўгустына, біскупа і доктара Касцёла, які адзначаўся ў гэты дзень, з’яўляецца вялікай урачыстасцю і галоўным патранальным святам у згаданай манаскай супольнасці.
![](/3/images/news/2019/09/2019-09-03-_ruszlewicz_sluby_26.jpg)
З такой нагоды ў кракаўскай базыліцы Божага Цела адбылася ўрачыстая Эўхарыстыя, цэлебрацыю якой узначаліў генеральны Абат Ордэна рэгулярных латэранскіх канонікаў дон Франко Бэргамін CRL.
Падчас Імшы брат Віктар Рушлевіч CRL, які паходзіць з парафіі Перамянення Пана ў Ваверцы (Лідскі дэканат), з трыма іншымі сабратамі прынёс вечныя манаскія абяцанні. Праз іх прынясенне ён назаўсёды злучыў сваё жыццё з ордэнам.
Ордэн рэгулярных канонікаў засноўвае сваю духоўнасць на Правіле святога Аўгустына. Браты гэтай манаскай супольнасці практыкуюць евангельскія цноты паслухмянасці, чыстасці і супольнага жыцця без уласнасці. Ордэн не прывязвае сваю душпастырскую дзейнасць да нейкай канкрэтнай сферы. Ён адкрыты для разнастайных формаў працы ў Касцёле.
![](/3/images/news/2019/09/2019-09-03-_ruszlewicz_sluby_31.jpg)
Дэвіз ордэну, які коратка сведчыць пра яго місію, — словы з Дзеяў Апосталаў: мець «адно сэрца і адзін дух», як у манаскім жыцці ў кляштарах, так і ў душпастырскім служэнні Касцёлу.
У Беларусі рэгулярныя латэранскія канонікі ужо шмат гадоў нясуць служэнне на тэрыторыі Гродзенскай дыяцэзіі ў Ваверцы, адкуль паходзіць брат Віктар Рушлевіч.
Цяпер там служыць святар, які таксама паходзіць з гэтай парафіі — кс. Андрэй Роўба CRL.
![](/3/images/news/2019/09/2019-09-03-_ruszlewicz_sluby_32.jpg)