1 жніўня ў Івянец прыбылі ўдзельнікі Дзявятай парафіяды дзяцей і моладзі Мінска-Магілёўскай архідыяцэзіі.
Удзел у парафіядзе — касцёльным спартова-культурным мерапрыемстве — цудоўная летняя прыгода, якая кожны год збірае ўсё больш ахвочых праявіць свае духоўныя і мастацкія таленты, а таксама фізічныя здольнасці.
Сёлета 125 дзяўчынак і хлопчыкаў з васьмі гадоў і юнакоў і дзяўчат да сямнаццаці гадоў прадстаўляюць 10 каманд з розных парафій Мінска-Магілёўскай архідыяцэзіі.
Самая шматлікая каманда з парафіі святой Ганны ў Дзяржынску складаецца з васямнаццаці ўдзельнікаў.
Многія сустракаюць у Івянцы сяброў, з якімі пазнаёміліся на мінулых парафіядах. Адразу пасля прыезду трэба паклапаціцца пра жытло, якім для большасці на чатыры дні стануць турыстычныя намёты. Не кожны можа хутка і якасна паставіць намёт, таму больш спрактыкаваныя дапамагаюць у гэтай справе менш дасведчаным аднагодкам. У лагеры ўдзельнікаў парафіяды адчуваецца дух сапраўднага братэрства, які не пакіне ўдзельнікаў і падчас спаборніцтваў.
Бліжэй да вечару адказныя каманд збіраюцца на жараб’ёўку. З непразрыстага пакета прадстаўнікі кожнай каманды па чарзе вымаюць шарыкі для настольнага тэнісу з напісанымі на іх лічбамі ад аднаго да дзесяці — па колькасці каманд-удзельніц.
У гэты час у Івянец прыбывае арцыбіскуп Тадэвуш Кандрусевіч, Мітрапаліт Мінска-Магілёўскі.
Ён падыходзіць да стала, дзе адбываецца жараб’ёўка, і абменьваецца прывітаннем з арганізатарамі і адказнымі. Некалькі жартаў іерарха падымаюць усім настрой і ствараюць радасную, нязмушаную атмасферу.
Пасля прыезду, усталявання і жараб’ёўкі прыходзіць час падсілкавацца. Малітву на пачатку вячэры праводзіць арцыбіскуп Кандрусевіч.
Пасля фізічнага пасілку адбываецца падрыхтоўка да пасілку духоўнага — святой Імшы. Слова іерарха і Эўхарыстыя духоўна ўмацоўваюць удзельнікаў парафіяды, і з касцёла яны ў сапраўдным алімпійскім шэсці скіроўваюцца да помніка святому Яну Паўлу ІІ, дзе адбываецца цырымонія адкрыцця.
І вось агонь Дзявятай парафіяды дзяцей і моладзі Мінска-Магілёўскай архідыяцэзіі запалены!
У бліжэйшыя дні Івянец будзе жыць гэтай цудоўнай рэлігійна-мастацка-спартовай падзеяй, гэтай цудоўнай летняй прыгодай, імя якой — парафіяда. Сачыце за развіццём падзей на парафіядзе ў Івянцы разам з парталам Catholic.by.
