8 ліпеня ксёндз канонік Уладзіслаў Завальнюк адзначае свой 70-гадовы юбілей. З гэтай нагоды юбіляра павіншаваў Мітрапаліт Мінска-Магілёўскі арцыбіскуп Тадэвуш Кандрусевіч.
Кіраўнік каталіцкага епіскапату нашай краіны адзначыў вялікі і неацэнны ўнёсак, зроблены адным з найстарэйшых святароў Мінска-Магілёўскай архідыяцэзіі, пробашчам парафіі св. Сымона і св. Алены ў Мінску, у справу адраджэння веры і структур Каталіцкага Касцёла ў Беларусі пасля дзесяцігоддзяў савецкага пераследу веры.
Уладзіслаў Завальнюк пачуў голас Хрыста, які паклікаў яго да святарства, у той час, калі з рэлігіяй вялося жорсткае змаганне.
Стаўшы святаром у далёкім 1974 годзе, малады ксёндз Уладзіслаў прыйшоў на дапамогу тым нешматлікім душпастырам, якіх з кожным годам станавілася ўсё менш.
Яго святарскае служэнне праходзіла ў розных частках Савецкага Саюза, пакуль напрыканцы 80-х гадоў мінулага стагоддзя Божы Провід не прывёў яго ў Беларусь, якая стала для ксяндза Уладзіслава другою радзімаю.
Тут ён адразу ж актыўна ўключыўся ў адраджэнне рэлігійнага жыцця.
Дзякуючы душпастырскай руплівасці ксяндза Уладзіслава Завальнюка і намаганням мінскіх католікаў удалося аднавіць набажэнствы ў касцёле св. Сымона і св. Алены, вядомым як Чырвоны касцёл, які сёння з’яўляецца важным асяродкам рэлігійнага жыцця і адным з сімвалаў беларускай сталіцы.
Ксёндз Уладзіслаў таксама распачаў намаганні, скіраваныя на вяртанне вернікам галоўнай каталіцкай святыні Мінска — катэдральнага касцёла Найсвяцейшага Імя Марыі і разам з кардыналам Казімірам Свёнткам давёў гэтую справу да канца. З імем сённяшняга пробашча парафіі св. Сымона і св. Алены звязана вяртанне не аднаго касцёла і заснаванне новых парафій у Мінску і наваколлі.
Вядомы сваімі творчымі евангелізацыйнымі задумамі, кс. Уладзіслаў паспрыяў развіццю культу Маці Божай Будслаўскай ва ўсёй Беларусі і арганізацыі пешых пілігрымак да святыні. Не апошнюю ролю адыграў святар і ў тым, што Будслаўскі фэст нядаўна быў унесены ЮНЕСКА ў спіс нематэрыяльных культурных каштоўнасцяў чалавецтва.
Немагчыма пералічыць усіх ініцыятываў і заслугаў гэтага рупліўца на Божай ніве, ды наўрад ці і трэба гэта рабіць: усе яны і без таго вядомыя Богу, якому святар аддана служыць ужо 45 гадоў.
Мясцовы Касцёл таксама ацаніў іх, надаўшы ксяндзу Уладзіславу Завальнюку годнасць каноніка Мінска-Магілёўскага катэдральнага капітулу.
Віншуючы святара з 70-гадовым юбілеем, арцыбіскуп Тадэвуш Кандрусевіч скіраваў яму словы шчырай пастырскай падзякі за ўсё тое, што ён рабіў і робіць на карысць вернага народа Мінска-Магілёўскага Касцёла. Іерарх пажадаў ксяндзу Уладзіславу духоўнай і фізічнай моцы, а таксама ўсіх патрэбных ласкаў і заступніцтва Маці Божай Будслаўскай на доўгія і святыя гады служэння Богу і людзям на беларускай зямлі.
Дырэктар парталу Catholic.by ксёндз Аляксандр Улас і супрацоўнікі рэдакцыі таксама шчыра віншуюць ксяндза каноніка Уладзіслава Завальнюка з 70-гадовым юбілеем і жадаюць яму моцнага здароўя, сапраўднага хрысціянскага аптымізму і радасці на кожны новы дзень жыцця.
