З 25 па 29 чэрвеня ў парафіі святых апосталаў Пятра і Паўла ў Дзітве (Лідскі дэканат Гродзенскай дыяцэзіі) адбыліся святыя місіі, якія праводзіў а. Андрэй Агель SP.
У гэтыя дні, асаблівым чынам насычаныя малітвай і Божым словам, вернікі не толькі аднавілі сваё духоўнае жыццё, але і ўзмацнілі веру, каб мужна ісці за Хрыстом, нягледзячы на цяжкасці сённяшняга свету.
На заканчэнне святых місій, 29 чэрвеня, адбыўся парафіяльны адпуст з нагоды ўрачыстасці святых апосталаў Пятра і Паўла.
Ён сабраў не толькі сённяшніх жыхароў Дзітвы, але і тых, хто паходзіць з гэтай мясцовасці і застаецца верным сваёй парафіі. Цэлебрацыю святой Імшы ў гэты дзень узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі. З ім разам маліліся біскупскі вікарый кс. канонік Уладзімір Гуляй і святары Лідскага дэканату.
У гаміліі біскуп Юрый прыгадаў постаць і жыццёвы шлях кожнага з апосталаў, якія былі вельмі рознымі людзьмі, але якіх аб’ядноўвала адзіная мэта — несці Божае слова і ісці за Хрыстом да самай смерці.
Напрыканцы Імшы прадстаўнікі парафіі распавялі гісторыю стварэння супольнасці і будаўніцтва святыні, для якога прыклаў вялікія намаганні пробашч кс. Рышард Перчак пры падтрымцы мясцовых вернікаў. Яны выказалі шчырую падзяку а. Андрэю Агелю SP за благаслаўлёны час святых місій, а таксама біскупу Юрыю Касабуцкаму, які ўпершыню наведаў парафію ў Дзітве.
Біскуп адзначыў, што яго асабліва ўразіў малітоўны подых, які адразу адчуваецца ў гэтай невялікай і не так даўно пабудаванай святыні, а таксама шчыры клопат і любоў парафіянаў.
Урачыстасць завяршылася эўхарыстычнай працэсіяй і благаслаўленнем місійнага крыжа, які быў ушанаваны спачатку духавенствам, а потым і ўсімі прысутнымі і які цяпер заўсёды будзе нагадваць кожнаму пра гэтую важную падзею ў жыцці і гісторыі парафіі.
