![](/3/images/news/2018/08/2017-07-25-phocab_l_40l-001.jpg)
8 верасня ў Волме (Стаўбцоўскі дэканат) з удзелам біскупа Юрыя Касабуцкага ўрачыста адзначаць 15-годдзе пабудовы новага касцёла св. Яна Хрысціцеля.
Хоць новая святыня з’явілася ў мястэчку зусім нядаўна, аднак парафія ў Волме — адна з самых старажытных у нашай краіне: касцёл тут існаваў ужо ў 1472 г. Драўляная барочная святыня — папярэдніца сучаснай — была пабудавана ў 1667 г., у 1751 г. перабудавана.
Перад Паўстаннем 1863 г. парафія ў Волме, якая ахоплівала мястэчка і навакольныя вёскі, налічвала каля 12 тыс. вернікаў.
Пасля задушэння Паўстання касцёл быў ператвораны ў праваслаўную царкву, якая дзейнічала да 1910 г., хоць валмянскія вернікі ігнаравалі загады царскіх сатрапаў і заставаліся вернымі каталіцтву.
![](/3/images/news/2018/08/2018-08-06-volma-kascel-6848-1336571696_b1.jpg)
Падчас Другой сусветнай вайны нацысцкія карнікі сагналі мясцовых жыхароў у касцёл, дзе мелі намер іх спаліць. Аднак Божы Провід і заступніцтва Багародзіцы, у гонар якой быў асвячаны касцёл у Волме, абаранілі іх ад смерці і не далі знішчыць чалавечыя жыцці разам са шматпакутнай святыняй.
Пасля вайны касцёл быў разрабаваны, вежы знесены, а будынак ператвораны спачатку ў школьную спартовую залу, а потым — у зернясховішча.
![](/3/images/news/2018/08/2018-08-06-medzvoum03-01.jpg)
У 1962 г. святыню разабралі да падмуркаў, што захаваліся да нашага часу як маўклівыя сведкі бязбожных злачынстваў царызму і бальшавізму.
Новы касцёл св. Яна Хрысціцеля быў пабудаваны ў Волме ў 2003 г., а праз год кансэкраваны.
Непадалёк ад Волмы знаходзіцца Святая гара (перайменаваная атэістычнымі савецкімі ўладамі імем бальшавіцкага ката Дзяржынскага) — найвышэйшы пункт у Беларусі.
Пробашч парафіі ў Волме кс. Валянцін Станкевіч шчыра запрашае ўзяць удзел ва ўрачыстай св. Імшы, цэлебрацыю якой у свята Нараджэння Найсвяцейшай Панны Марыі 8 верасня а 12-й гадзіне ўзначаліць тут Генеральны вікарый Мінска-Магілёўскай архідыяцэзіі біскуп Юрый Касабуцкі.