3-5 студзеня ў Міждыяцэзіяльнай вышэйшай духоўнай семінарыі ў Пінску пройдзе сустрэча для міністрантаў, а таксама для юнакоў, якія разважаюць над сваім пакліканнем.
Пагрузіўшыся ў адмысловую атмасферу семінарыйнага жыцця, маладыя людзі змогуць на працягу некалькіх дзён удзельнічаць у багатым на разнастайныя падзеі жыцці духоўнай установы.
Сярод шматлікіх літургічных, духоўных і пазнавальных заняткаў юнакі змогуць разам з семінарыстамі паспаборнічаць у настольным тэнісе, футболе і шахматах. Таксама будзе магчымасць зазірнуць у залу музычнага семінарыйнага гурта «Подых духа», дзе ствараюцца новыя музычныя творы і праходзяць рэпетыцыі музычна-евангелізацыйных праграм, якія ўдзельнікі гурта рыхтуюць для моладзі.
Асаблівасцю гэтай сустрэчы будзе знаёмства з каляднымі звычаямі і традыцыямі, іх значэннем для мінулага і сучаснасці. Таксама спецыяльны сюрпрыз для ўдзельнікаў сустрэчы рыхтуе біскуп Пінскі Антоні Дзям'янка. Акрамя таго, плануецца экскурсія па цікавых гістарычных мясцінах.
На сустрэчу запрашаюцца ўсе жадаючыя юнакі ад 14 гадоў.
Запісацца можна ў пробашча парафіі або па наступных тэлефонах:
- +375 16 565 41 45;
- +375 25 604 41 86
