22 лістапада, ва ўспамін святой Цэцыліі, панны і мучаніцы, апякункі касцёльнай музыкі і спеваў, у катэдральнай базыліцы святога Францішка Ксавэрыя ў Гродне адбудзецца святочны канцэрт духоўнай музыкі ў выкананні дыяцэзіяльнага хору «Cantate Domino».
У гэты дзень харысты, для якіх музычная дзейнасць складае вельмі важную частку жыцця, падзякуюць Богу за 25 гадоў існавання калектыву і магчымасць праз сваю тврочасць несці людзям святло любові Хрыста.
А 19-й гадзіне будзе цэлебравацца святая Імша, пасля якой адбудзецца святочны канцэрт пад кіраўніцтвам Генрыха Давідовіча, нязменнага кіраўніка і дырыжора хору.
Хор «Cantate Domino» быў заснаваны ў 1999 годзе ў гродзенскай парафіі Божай Міласэрнасці (Вішнявец).
Рэпертуар калектыву складаецца са спеваў на ўсе літургічныя перыяды, сярод якіх творы знакамітых кампазітараў.
Анлайн-трансляцыя канцэрта будзе даступная на канале гродзенскай катэдры ў YouTube.
