У суботу 8 чэрвеня ў горадзе Беразіно (Мінска-Магілёўская архідыяцэзія, Барысаўскі дэканат) адбудзецца ўрачыстае пасвячэнне касцёла Маці Божай Міласэрнасці.
У гэты дзень у Касцёле будзе адзначацца ўспамін Беззаганнага Сэрца Найсвяцейшай Панны Марыі.
Абрад пасвячэння святыні здзейсніць арцыбіскуп Юзаф Станеўскі — упершыню на пасадзе Мінска-Магілёўскага Мітрапаліта.
- Пачатак у 11.00.
- Адрас: г. Беразіно, вул. Красіна, 1-А.
З гісторыі парафіі
Каталіцкая парафія ў Беразіне існуе з 1641 года. Першую святыню тут заснаваў Маршалак дворны літоўскі Казімір Леў Сапега па распараджэнні караля Рэчы Паспалітай Яна Казіміра.
Будаўніцтва касцёла была скончана ў 1644 годзе, і ён быў пасвячаны ў гонар Найсвяцейшай Панны Марыі з гары Кармэль. Пазней святыня атрымала тытул Унебаўзяцця Найсвяцейшай Панны Марыі.
На пачатку XX стагодзя парафія ў тагачасным мястэчку Беразіно налічвала каля 7 тыс. вернікаў і мела філіяльныя касцёлы ў Багушэвічах і Раванічах. У Беразіне дзейнічала драўляная капліца на каталіцкіх могілках. У 1930 гадах капліца была зачынена, а ў пасляваенны час разбурылася. Касцёл жа згарэў яшчэ падчас пажару ў 1914 годзе.
Толькі ў 1997 годзе была пасвячана часовая капліца па вуліцы Піянерскай 25.
Будаўніцтва новага касцёла распачалося ў 2018 годзе, а крыж на месцы будучай святыні благаславіў 5 красавіка 2016 года асвяціў біскуп Юрый Касабуцкі.
Новы касцёл быў пабудаваны ў гістарычным цэнтры горада намаганнямі вернікаў беразінскай парафіі на чале з іх пробашчам ксяндзом Андрэем Фёдаравым.
Ад імя парафіянаў святар шчыра запрашае ўсіх ахвотных узяць удзел у пасвячэнні касцёла Маці Божай Міласэрнасці ў горадзе Беразіно, які знаходзіцца на паўдарогі з Мінска ў Магілёў.
