З нагоды 80-й гадавіны мучаніцтва сясцёр назарэтанак, якія аддалі сваё жыццё дзеля ўратавання навагрудскіх мужчын і святара, у суботу 29 ліпеня ў касцёл святога Арханёла Міхала ў Навагрудку будуць урачыста ўнесены рэліквіі і выявы расстраляных гітлераўцамі мучаніц Другой сусветнай вайны.
Па запрашэнні, скіраваным ад імя парафіянаў ксяндзом пробашчам Юрыем Жэгарыным, унясенне рэліквій у святыню здзейсніць Правінцыйная настаяцельніца супольнасці сясцёр Найсвяцейшай Сям’і з Назарэта сястра Філатэя Ціхановіч CSFN.
Акрамя таго, сем’і парафіі ўнясуць адзінаццаць абразоў мучаніц, а таксама выявы асоб, звязаных з тымі драматычнымі падзеямі. Абразы былі намаляваныя з аўтэнтычных архіўных здымкаў кожнай сястры.
Цырымонія ўнясення рэліквій і абразоў у касцёл адбудзецца а 12-й гадзіне.
Абразы мучаніц будуць пэўны час знаходзіцца ў касцёле святога Арханёла Міхала ў Навагрудку, пасля чаго плануецца распачаць іх перэгрынацыю па іншых святынях нашай краіны, згодна з пажаданнямі вернікаў і іх душпастыраў.
Памятныя ўрачыстасці ў 80-ю гадавіну мучаніцкай смерці сясцёр назарэтанак адбудуцца ў Навагрудку 31 ліпеня – 1 жніўня.
