У Быстрыцы на Астравеччыне з удзелам біскупаў Касабуцкага і Кашкевіча адзначаць 500-годдзе касцёла

Фота: planetabelarus.by

23 і 24 ліпеня ў касцёле Узвышэння Святога Крыжа ў Быстрыцы (Гродзенская дыяцэзія, Астравецкі дэканат) пройдуць юбілейныя ўрачыстасці з нагоды 500-годдзя мясцовай святыні.

Як нагадвае Grodnensis.by, кароль Ягайла ў 1390 годзе заснаваў тут драўляны касцёл і кляштар, запрасіўшы ў мястэчка манахаў з Ордэна Рэгулярных Латэранскіх Канонікаў.

У ваколіцах Быстрыцы нарадзіўся таксама благаслаўлёны Міхал Гедройць, які даў свае манаскія абяцанні ў мясцовым кляштары. Сёння яго рэліквіі захоўваюцца ў тутэйшай мураванай святыні Узвышэння Святога Крыжа, якая была ўзведзена ў 1523 годзе замест зруйнаванага драўлянага касцёла.

Касцёл на малюнку ХІХ ст. / wikiwand.com

Праграма ўрачыстасцяў

• 23 чэрвеня
  • 20.00 – асвячэнне Святаянскай крыніцы, фігуры святога Яна Хрысціцеля і крыжа. Узначаліць абрады Генеральны вікарый Мінска-Магілёўскай архідыяцэзіі біскуп Юрый Касабуцкі.
    Святаянская крыніца — крыніца з гаючай вадой побач з вёскай Быстрыца, побач з якой узведзена капліца.
• 24 чэрвеня
  • 12.00 – святая Імша з удзелам біскупа Гродзенскага Аляксандра Кашкевіча, благаслаўленне мемарыяльнай шыльды.