У Вялікі чацвер, які сёлета прыпадае 6 красавіка, у паўсюдным Касцёле адбываецца ўспамін устанаўлення сакрамэнтаў Эўхарыстыі і святарства.
У першай палове дня ў катэдральных касцёлах з гэтай нагоды цэлебруюцца Імшы з удзелам біскупаў і прэзбітэрыя, падчас якіх здзяйсняецца кансэкрацыя алея Хрызма і благаслаўленне алея хворых.
У Мінска-Магілёўскай архідыяцэзіі ўрачыстыя цэлебрацыі Імшы Хрызма будуць адбывацца ў архікатэдральным касцёле Найсвяцейшага Імя Марыі ў Мінску і ў старадаўняй катэдры Унебаўзяцця Найсвяцейшай Панны Марыі і святога Станіслава ў Магілёве.
Імша Хрызма распачнецца:
- у Мінску — 10.00;
- у Магілёве — 11.00.
У сталіцы цэлебрацыю Імшы Хрызма ўзначаліць Мітрапаліт Мінска-Магілёўскі арцыбіскуп Юзаф Станеўскі з удзелам Апостальскага нунцыя ў Беларусі арцыбіскупа Антэ Ёзіча і Апостальскага адміністратара для беларускіх грэка-католікаў архімандрыта Сяргея Гаека, а ў Магілёве — Генеральны вікарый Мінска-Магілёўскай архідыяцэзіі біскуп Юрый Касабуцкі з удзелам адказнага за Магілёўскі рэгіён Генеральнага вікарыя архідыяцэзіі біскупа Аляксандра Яшэўскага SDB.
Пасля Імшаў адбудуцца пастырскія сустрэчы духавенства і кансэкраваных асоб Міншчыны і Магілёўшчыны.
Удзел у гэтых святых Імшах могуць узяць усе ахвотныя.
З мінскага катэдральнага касцёла на партале Catholic.by будзе весціся анлайн-трансляцыя ўрачыстай цэлебрацыі.
