У суботу 4 лютага ў Нацыянальным санктуарыі ў Будславе ў межах Вялікай навэнны падрыхтоўкі да юбілею 25-годдзя каранацыі цудадзейнага абраза Маці Божай Будслаўскай пройдзе агульнабеларускі Дзень кансэкраванага жыцця.
Такія мерапрыемствы штогод праходзяць з нагоды ўрачыстасці Ахвяравання Пана, якая ў Каталіцкім Касцёле адзначаецца 2 лютага і з’яўляецца таксама Днём кансэкраванага жыцця — асаблівым святам усіх тых, хто без рэшты прысвяціў сябе служэнню Богу ў манаскім або законніцкім жыцці.
Дэвізам агульнабеларускай сустрэчы кансэкраваных асоб у год юбілею 25-годдзя з часу каранацыі цудадзейнага абраза Маці Божай Будслаўскай былі выбраныя словы, якія нагадваюць першы цуд Хрыста, здзейснены Ім па просьбе Яго Маці Марыі падчас вяселля ў Кане Галілейскай: «Зрабіце, што вам кажа Сын» (пар. Ян 2, 5).
Мерапрыемства на нацыянальным узроўні ў Будславе арганізуе Каардынацыйная група вышэйшых настаяцеляў, дэлегатаў і прадстаўнікоў мужчынскіх і жаночых манаскіх інстытутаў і таварыстваў апостальскага жыцця ў Беларусі. Яе старшыня ксёндз Анджэй Юхневіч ОМІ запрашае ўсіх кансэкраваных асоб, якія нясуць служэнне ў нашай краіне, а таксама ўсіх людзей добрай волі, хто хоча маліцца за кансэкраванах асоб, узяць удзел у гэтай падзеі.
Акрамя таго, будзе магчымасць духоўна далучыцца да супольнай малітвы ў Агульнабеларускі дзень кансэкраванага жыцця з дапамогай анлайн-трансляцыі на YouTube-канале Нацыянальнага санктуарыя Маці Божай Будслаўскай.
Праграма сустрэчы(для кансэкраваных асоб)
- 10.45 – прывітанне
- 11.00 – канференцыя «Зрабіце, што вам кажа Сын» (айцец Павел Раманчук OFMConv)
- 12.00 – святая Імша з аднаўленнем манаскіх абяцанняў (узначальвае цэлебрацыю біскуп Аляксандр Яшэўскі SDB, Адказны за пастырства Інстытутаў кансэкраванага жыцця і таварыстваў апостальскага жыцця пры ККББ)
- 13.15 – абед
- 14.00 – «Напоўніце збаны вадою»: медытацыя ў беларускай Кане Галілейскай
- 15.00 – Вяночак да Божай Міласэрнасці
- 15.15 – благаслаўленне і выезд
Рада Каардынацыйнай групы бярэ на сябе абавязак арганізаваць і правесці агульнабеларускі Дзень кансэкраванага жыцця, захоўваючы ўсе санітарныя нормы і сацыяльную дыстанцыю паміж удзельнікамі.
Увага! Для лепшай арганізацыі неабходна пацвердзіць удзел у мерапрыемстве да 25 студзеня ўключна, зарэгістраваўшыся па спасылцы ТУТ>>>
