У чацвер 13 кастрычніка, у 175-ю гадавіну з дня нараджэння Слугі Божага Эдварда Вайніловіча, фундатара касцёла святога Сымона і святой Алены ў Мінску, у мінскім катэдральным касцёле Найсвяцейшага Імя Марыі аўбудзецца святая Імша ў інтэнцыі яго хутчэйшай беатыфікацыі і аднаўленні рэлігійнага жыцця ў Чырвоным касцёле.
На сваёй старонцы ў сацыяльнай сетцы Facebook Генеральны вікарый Мінска-Магілёўскай архідыяцэзіі біскуп Юрый Касабуцкі запрашае ўзяць удзел у супольнай малітве, да якой можна будзе таксама духоўна далучыцца з дапамогай прамой трансляцыі.
«Слуга Божы Эдвард Вайніловіч пакінуў велізарны след пас сабе ў Беларусі. Быў фундатарам не адной святыні, сам асабіста дабіваўся дазволу царскіх уладаў у Пецярбурзе на пабудову касцёла святога Сымона і святой Алены ў Мінску. Радаваўся, калі касцёл быў пабудаваны дзеля праслаўлення Бога, цэлебрацыі святой Імшы і іншых сакрамэнтаў.
13 кастрычніка ў 18.30 у мінскай архікатэдры (на жаль, не ў фундаваным ім касцёле) адбудзецца святая Імша з нагоды юбілею 175-годдзя з дня нараджэння Эдварда Вайніловіча.
Запрашаю на гэтую малітву, каб мы маглі разам маліцца аб хутчэйшай беатыфікацыі Слугі Божага Эдварда і аднаўленні рэлігійнага жыцця ў святыні, для гэтага пабудаванй. Да Імшы можна будзе далучыцца таксама on-line», — напісаў біскуп Юрый Касабуцкі, які ўзначаліць цэлебрацыю святой Імшы ў архікатэдры.
Пачтатак 13 кастрычніка 2022 года ў 18.30.
