Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB, адказны за Магілёўскі рэгіён, запрашае ўсіх ахвотных узяць удзел у пешай пілігрымцы з Магілёва ў Бялынічы на фэст у гонар Маці Божай Бялыніцкай, які сёлета пройдзе 4 верасня.
Глыбокапаважаныя святары, кансэкраваныя асобы,
дарагія браты і сёстры і ўсе людзі добрай волі!
Вось і настала чарга восеньскай пілігрымкі вернікаў да Маці Божай Бялыніцкай. У першы тыдзень верасня адправіцца Пешая пілігрымка з Магілёва ў Бялынічы — гарадок, які называлі «беларускай Чэнстаховай». Гэта адна з самых важных падзей і пастырскіх акцый у штогадовым літургічным календары Магілёўскага рэгіёна Мінска-Магілёўскай архідыяцэзіі.
Пілігрымка распачнецца ў суботу 3 верасня святой Імшой а 9-й гадзіне ў магілёўскай катэдры.
Сардэчна запрашаю ўсіх вернікаў Магілёўскай вобласці, Мінска-Магілёўскай архідыяцэзіі і ўсёй нашай краіны, асабліва моладзь, адважна далучыцца да пілігрымкі ў гэтым годзе. Калі ласка, прыкладзіце ўсе намаганні для таго, каб актыўна прыняць удзел у пешым шляху да Божай Маці.
А тых, хто па важных прычынах не можа ісці пешшу, заклікаю прыбыць на Бялыніцкі фэст, выкарыстоўваючы розныя транспартныя сродкі, каб прыняць удзел у галоўнай адпустовай святой Імшы ў нядзелю 4 верасня а 15-й гадзіне, якую ўпершыню ўзначаліць Мітрапаліт Мінска-Магілёўскі арцыбіскуп Юзаф Станеўскі.
Усім пілігрымам жадаю неабходных фізічных сіл і вытрымкі, а таксама багатага духоўнага плёну. Даручаю вас матчынай апецы Бялыніцкай Багародзіцы і ад усяго сэрца благаслаўляю.
✠Аляксандр Яшэўскі S.D.B.
Генеральны вікарый Мінска-Магілёўскай архідыяцэзіі
Па пытаннях адносна пілігрымкі звяртацца па тэл.:
- +375 (25) 547 41 35 — Яна Шумская
або: - +375 (29) 570 85 87 — ксёндз Юзаф Сярпейка, пробашча парафіі ў Бялынічах
