14 жніўня ў санктуарыі Гродзенскай дыяцэзіі Маці Божай Каралевы нашых сем’яў у Тракелях адбудзецца малітоўная сустрэча велапілігрымаў з розных куткоў Гродзенскай дыяцэзіі. Узяць удзел у велапілігрымцы запрашае кусташ Тракельскага санктуарыя ксёндз канонік Юрый Бяганскі.
Далучыцца да яе могуць таксама ўладальнікі скутэраў, электраровароў і электрасамакатаў.
Пілігрымаў чакае насычаная праграма: супольная малітва, спартовыя конкурсы, гонкі, адпачынак у Марыйным садзе і іншае.
Арганізатары адзначаюць, што велапілігрымка — гэта не спартовае мерапрыемства і не тэст на трываласць, а своеасаблівая форма сустрэчы з самім сабой, іншым чалавекам і Богам.
Пілігрымаў запрашаюць скіравацца ў Тракелі на сустрэчу з Маці не толькі паасобку, але і сем’ямі.
У санктуарыі ўдзельнікі велапілігрымкі будуць мець магчымасць даручыць усе свае інтэнцыі Маці Божай.
Праграма сустрэчы
- 12.00 — прывітанне велапілігрымаў
- 12.30 — Ружанец
- 13.00 — святая Імша
- 14.20 — пачастунак
- 15.00 — Вяночак да Божай Міласэрнасці
- 15.20 — конкурс «Лепшы велапілігрым 2022»
- 16.00 — благаслаўленне і ад’езд
