У аўторак 16 лістапада, ва ўспамін Маці Божай Вастрабрамскай, арцыбіскуп эмерыт Тадэвуш Кандрусевіч узначаліць цэлебрацыю святой Імшы ў касцёле святога Сымона і святой Алены ў Мінску (Чырвоны касцёл).
Абраз Маці Божай Вастрабрамскай, якая ўшаноўваецца ў Вільні як Маці Міласэрнасці, — вялікая святыня трох народаў: літоўскага, беларускага і польскага. Культ цудадзейнай іконы з Вострай Брамы да гэтага часу шырока распаўсюджаны на нашых землях, асабліва на тых, якія раней уваходзілі ў склад даўняй Віленскай архідыяцэзіі. Яе выява была змешчана на біскупскім гербе першага Мітрапаліта Мінска-Магілёўскага і адзінага ў сучаснай гісторыі Беларусі кардынала Казіміра Свёнтка, які абраў дэвізам свайго пастырскага служэння словы Mater Misericordiæ — «Маці Міласэрнасці». Маці Божая Вастрабрамская лічыцца галоўнай Апякункай Гродзенскай дыяцэзіі.
Арцыбіскуп Тадэвуш Кандрусевіч, які распачаў сваё святарскае служэнне ў віленскай парафіі святой Тэрэзы пры Вострай Браме, з нагоды ўспаміну Маці Божай Вастрабрамскай будзе цэлебраваць у Чырвоным касцёле святую Імшу, якая распачнецца ў 19.00.
Прамую трансляцыю цэлебрацыі можна паглядзець на YouTube-канале мінскай парафіі святога Сымона і святой Алены.
