У чацвер 28 кастрычніка, у свята святых апосталаў Сымона і Юды Тадэвуша, арцыбіскуп эмерыт Тадэвуш Кандрусевіч узначаліць цэлебрацыю святой Імшы ў мінскім катэдральным касцёле Найсвяцейшага Імя Марыі.
Духоўна далучыцца да Эўхарыстыі можна з дапамогай прамой трансляцыі на партале Catholic.by.
Урачыстая Эўхарыстыя ў галоўнай святыні Мінска-Магілёўскай архідыяцэзіі распачнецца ў 18.30. Ёй будзе папярдэднічаць выстаўленне Найсвяцейшага Сакрамэнту і ружанцовае набажэнства ў 18.00.
Пробашч сталічнай архікатэдральнай парафіі ксёндз канонік Антоні Клімантовіч шчыра запрашае ўсіх ахвотных узяць удзел у супольнай малітве за заслужанага іерарха, які ў 1989 годзе стаў першым у сучаснай гісторыі Беларусі каталіцкім біскупам на нашых землях, а з 2007 па 2021 год нёс служэнне Мітрапаліта Мінска-Магілёўскага.
Дырэктар парталу Catholic.by ксёндз доктар Аляксандр Улас ад імя супрацоўнікаў рэдакцыі віншуе арцыбіскупа Тадэвуша Кандрусевіча з імянінамі і жадае заслужанаму беларускаму іерарху праз заступніцтва яго святога апекуна апостала Юды Тадэвуша шчодрых Божых ласкаў, непахіснай веры і моцнага здароўя душы і цела на доўгія і святыя гады.
З імянінамі!
