«Веру ў адзіную, святую, паўсюдную і апостальскую Царкву», — гэтыя словы з Сімвала веры сталі дэвізам пілігрымкі Беларускай Грэка-Каталіцкай Царквы з нагоды 425-годдзея Берасцейскай уніі.
Пілігрымку беларускія грэка-католікі перажываюць у духоўным фармаце.
Дні з 7 па 9 ліпеня — час асаблівай малітвы вернікаў у парафіях і супольнасцях.
- Серада 7 ліпеня была днём малітваў ва Усходнім протапрэзбітэраце. Боскую Літургію ў храме Уваскрасення Гасподняга ў Віцебску адслужылі архімандрыт Сяргей Гаек і протапрэзбітэр Зміцер Грышан.
- На наступны дзень малітвы праходзілі ў Заходнім протапрэзбітэраце: Боскую Літургію ў капліцы Маці Божай Фацімскай у Гродне служыў протапрэзбітэр Андрэй Крот.
- У пятніцу праводзіцца дзень малітваў у Цэнтральным протапрэзбітэраце. Боскую Літургію ў храме парафіі святога Праведнага Язэпа ў Мінску у 18.30 протапрэзбітэр Андрэй Абламейка саслужыць з клірам сталіцы.
- У суботу 10 ліпеня пілігрымы ў індывідуальным парадку прыбываюць у Полацк, наведваюць хрысціянскія храмы горада.
А 16-й гадзіне ў храме Святой Сафіі адбудзецца канцэрт арганнай музыкі на ўспамін місіі Торвальда Вандроўніка ў Полацк. Тэма канцэрта: «На скрыжаванні шляхоў і традыцый». - У нядзелю 11ліпеня адбудзецца святочнае завяршэнне Пілігрымкі ў Полацку, пры храме святой Параскевы Полацкай (вул. Навасёлаў, 70).
Святочная Боская Літургія распачнецца ў 11.00.
