Сёлета прыпадае 77-я гадавіна мучаніцкай смерці благаслаўлёных назарэтанак — сястры Марыі Стэлы і дзесяці яе паплечніц.
Як паведамляе партал Grodnensis.by, з гэтай нагоды 31 ліпеня ў Батароўскім лесе каля Навагрудка — месцы, дзе сёстры законныя прынялі смерць, — адбудзецца святая Імша.
Пачатак у 18.00.
Пасля Імшы можна будзе наведаць санктуарый Гродзенскай дыяцэзіі благаслаўлёнай Марыі Стэлы і яе 10 паплечніц, дзе будзе магчымасць памаліцца перад рэліквіямі благаслаўлёных.
Законніцы Кангрэгацыі Сясцёр Найсвяцейшай Сям’і з Назарэта былі расстраляны 1 жніўня 1943 г., ахвяраваўшы сваё жыццё за 120 чалавек, арыштаваных і прысуджаных да расстрэлу. Смяротнае пакаранне было заменена для арыштаваных працамі ў Германіі. Усе вывезеныя перажылі вайну.
Назарэтанкі былі беатыфікаваны 5 сакавіка 2000 г. на плошчы св. Пятра ў Рыме Янам Паўлам ІІ.
