Агульнабеларускі дзень духоўнага засяроджання для манаскіх супольнасцяў, якія нясуць служэнне ў Беларусі, пройдзе 25 мая анлайн з Нацыянальнага санктуарыя ў Будславе.
Рашэнне аб гэтым было прынята на пасяджэнні Рады Каардынацыйнай групы вышэйшых настаяцеляў, дэлегатаў і прадстаўнікоў мужчынскіх і жаночых манаскіх інстытутаў і таварыстваў апостальскага жыцця, якое адбылося 5 мая, таксама ў рэжыме анлайн.
У панядзелак 25 мая ўдзельнікі Рады прадставяць у Нацыянальным санктуарыі Маці Божай Будслаўскай усіх братоў і сясцёр, якія нясуць служэнне ў Беларусі.
Усе яны змогуць духоўна далучыцца і ўзяць удзел у дні духоўнага засяроджання анлайн з дапамогай трансляцыі на партале Catholic.by.
Сардэчна запрашаем усіх кансэкраваных асобаў, якія нясуць служэнне ў Беларусі, узяць удзел у дні засяроджання анлайн, каб у сённяшні няпросты час духоўна з’яднацца перад цудадзейным абразом нашай Нябеснай Маці ў супольнай малітве аб найхутчэйшым спыненні пандэміі каранавірусу і даверыць Марыі нашыя супольнасці і ўсіх тых, хто даручаны нашай пастырскай апецы.
Праграма дня духоўнага засяроджання
- 10.30 — Гадзінкі аб Беззаганным Зачацці Найсвяцейшай Панны Марыі
- 11.00 — святая Імша
- 12.00 — выстаўленне Найсвяцейшага Сакрамэнту са святым Ружанцам і Маёвым набажэнствам
- 13.00 — Акафіст.
Просьба да настаяцеляў і настаяцельніц перадаць гэтую інфармацыю і запрашэнне ўсім братам і сёстрам і заахвоціць іх да ўдзелу ў дні засяроджання.
