Замест запланаванага велікапоснага чування моладзі Мінска-Магілёўскай архідыяцэзіі ў сувязі з эпідэміяй каранавірусу 28 сакавіка адбудзецца адмысловае набажэнства, якое пройдзе ў касцёле святога Сымона і святой Алены ў Мінску і будзе транслявацца ў інтэрнэце на «Радыё Марыя».
Дзякуючы выкарыстанню сучасных тэхналогій камунікацыі будзе магчымасць духоўнага ўдзелу ў малітве большай колькасці моладзі, што, нягледзячы на выкліканыя каранавірусам складанасці, будзе спрыяць будаванню супольнасці каталіцкай моладзі Мінска-Магілёўскай архідыяцэзіі і ўсёй краіны.
Праграма супольнай малітвы:
- 19.00 — св. Імша; цэлебрацыю ўзначаліць арцыбіскуп Тадэвуш Кандрусевіч, які звернецца да прысутных і слухачоў «Радыё Марыя» з адмысловым пастырскім словам;
- пасля Імшы — адарацыя Найсвяцейшага Сакрамэнту;
- 20.30 — малітва святога Ружанцу і благаслаўленне.
Набажэнства будзе прысвечана малітве за моладзь і аб выбаўленні нашага народа ад пажару, голаду, вайны і віруснай заразы, згодна са старажытнай малітвай Касцёла.
Моладзь і іншых вернікаў, якія будуць мець жаданне, арцыбіскуп Тадэвуш Кандрусевіч заахвоціў далучыцца да гэтай малітвы ў касцёле святога Сымона і святой Алены або маліцца ў гэты час дома ці ў сваіх парафіях.
