17 лістапада, у Дзень памяці ахвяраў ДТЗ, у касцёлах Беларусі будуць маліцца за тых, хто загінуў і пацярпеў у дарожна-транспартных здарэннях, а таксама аб бяспецы дарожнага руху.
Згодна з рашэннем Пленарнай Асамблеі ААН ад 26 кастрычніка 2005 г. у трэцюю нядзелю лістапада адзначаецца сусветны дзень памяці ахвяраў дарожна-транспартных здарэнняў.
З гэтай нагоды ў нядзелю 17 лістапада пройдуць спецыяльныя малітвы і набажэнствы. У гэты дзень прынята таксама благаслаўляць і акрапляць асвячанаю вадою дарогі, перадусім найбольш небяспечныя ўчасткі, дзе не раз здараліся няшчасныя выпадкі.
Як адзначаецца ў лісце, скіраваным кіраўніцтвам мясцовага дабрачыннага фонду «Бяспечныя дарогі» Старшыні Канферэнцыі Каталіцкіх Біскупаў у Беларусі арцыбіскупу Тадэвушу Кандрусевічу, «у гэты дзень памяці хочацца, каб прамень веры і малітвы дакрануўся да сэрца кожнага ўдзельніка дарожнага руху».
