22 лістапада, ва ўспамін святой Цэцыліі, панны і мучаніцы, апякункі касцёльнай музыкі і спеву, у катэдральнай базыліцы святога Францішка Ксавэрыя ў Гродне адбудзецца святочны канцэрт дыяцэзіяльнага хору Cantate Domino.
У гэты дзень удзельнікі музычнага калектыву, нязменным кіраўніком і дырыжорам якога з’яўляецца Генрых Давідовіч, падзякуюць Богу за 20 гадоў існавання хору і магчымасць несці праз спеў святло любові Хрыста сваім братам і сёстрам.
З гэтай нагоды а 19-й гадзіне ў галоўнай святыні Гродзенскай дыяцэзіі адбудзецца святая Імша, пасля пасля якой — святочны канцэрт дыяцэзіяльнага хору Cantate Domino.
Калектыў быў заснаваны ў 1999 годзе ў гродзенскай парафіі Божай Міласэрнасці (Вішнявец). Хор выконвае спевы на беларускай, лацінскай і польскай мовах. Рэпертуар калектыву складаецца як з касцёльных, так і з класічных твораў.
