30 чэрвеня ў Смаргоні на святой Імшы, з якой пілігрымы Салезіянскай моладзевай евангелізацыйнай пілігрымкі (СМЕП) распачнуць свой шлях да Маці Божай Будслаўскай, брат Юрый Пашкавец SDB прынясе вечныя манаскія абяцанні ў салезіянскім Таварыстве.
Святая Імша распачнецца а 10-й гадзіне ў касцёле св. Міхала Арханёла ў Смаргоні (вул. Балыша, 1).
Пра гэта на старонцы sdb.by паведаміў Рэгіянальны настаяцель Таварыства Святога Францішка Сальскага кс. Віктар Гайдукевіч SDB.
«Гэтая падзея назаўсёды звяжа брата Юрыя шлюбамі чысціні, паслухмянасці і беднасці з Таварыствам святога Францішка Сальскага.
Вечныя абяцанні маладога сабрата Богу з’яўляюцца важнай падзеяй для усяго салезіянскага Таварыства і беларускай салезіянскай супольнасці ў асаблівасці», — адзначыў пры гэтым настаяцель.
Дзелячыся гэтаю радасцю, кс. Віктар Гайдукевіч таксама заклікаў усю салезіянскую сям’ю — сясцёр салезіянак, салезіянаў супрацоўнікаў, ADMA, аніматараў, парафіяльныя суполкі, колы, а асабліва дзяцей і моладзь — атуляць брата Юрыя Пашкаўца малітоўнай падтрымкай у гэты важны і асаблівы для яго момант, а таксама прасіць аб ласцы трываласці на выбраным шляху служэння Богу і людзям у салезіянскім Таварыстве.
