Ліст Прэзідэнту Сірыі Башару Асаду, які Папа Францішак перадаў яму праз Апостальскага Нунцыя ў Дамаску кардынала Марыё Дзенары, стаў «гістарычным жэстам» і «знакам надзеі для ўсіх». Пра гэта заявіў Апостальскі вікарый Алепа для католікаў лацінскага абраду біскуп-францысканец Джордж Абу Хазен.

«Ролю Святога Айца высока цэніць большасць сірыйцаў — і тыя, хто падтрымлівае ўрад, і тыя, хто выступае супраць яго; і хрысціяне, і мусульмане», — заявіў біскуп Абу Хазен.

«На фоне адсутнасці заходніх паслоў у Дамаску рашэнне Ватыкана пакінуць тут свайго прадстаўніка і рашэнне Папы ўзвесці Нунцыя ў кардынальскі чын сталі знакамі ўвагі і любові. Кіраўніцтва і насельніцтва краіны высока ацанілі гэтыя рашэнні».

У сваім пасланні Асаду Пантыфік рашуча асудзіў «экстрэмізм і тэрарызм», якія з’яўляюцца асновай гвалту. Папа выразіў салідарнасць з сірыйскім народам, які за пяць гадоў канфлікту страціў сотні тысяч забітымі і мільёны бежанцамі.

Пантыфік таксама заклікаў кіраўніка сірыйскай дзяржавы «забяспечыць поўнамаштабнае выкананне міжнароднага гуманітарнага права ў тым, што датычыць абароны мірных грамадзян і доступу да гуманітарнай дапамогі».

Сірыйская дзяржаўнае агенцтва навін «Сана» апублікавала ўрыўкі з папскага ліста, а сірыйскія тэлеканалы і газеты шырока асвячалі сустрэчу Нунцыя з прэзідэнтам краіны.

«Для нас у Алепа і ў многіх іншых рэгіёнах краіны насталі дні надзеі — мы чакаем поўнага вызвалення і аб’яднання горада», — адзначыў прэлат.

Да вайны Алепа — другі па велічыні горад Сірыі — быў эканамічным і гандлёвым цэнтрам краіны. З 2012 года заходняя частка горада, у якой пражывала 1,2 млн чалавек, засталася пад кантролем войск ураду, а ўсходняя, з яе 250 тысячамі жыхароў, была захоплена джыхадыстамі.

Паводле blagovest-info.ru (IL)