Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Быў мусульманінам, стаў каталіцкім арцыбіскупам і ахрысціў свайго бацьку-імама
22.10.2015 14:24

Старшыня епіскапату афрыканскай краіны Малаві распавёў у эфіры італьянскага тэлебачання пра свой лёс.

Арцыбіскупа Томаса Луку Мсуса SMM з Малаві запрасілі ў эфір канала Tv2000 распавесці пра Сінод Біскупаў, які праходзіць у Ватыкане, аднак неспадзявана размова перайшла на гісторыю навяртання самога іерарха.

«Я паходжу з мусульманскай сям'і, мой бацька быў імамам і адным з найбольш строгіх у краіне. Але аднойчы, калі я ўжо быў каталіцкім біскупам, прыйшоў да мяне, упаў на калені і сказаў: "Хачу ахрысціцца"», — распавёў арцыбіскуп.

«Я папрасіў аб хросце, калі мне было 12 гадоў. Яшчэ раней збягаў з дому, бо ў сям'і пачуваўся чужым і прыніжаным. Хаваўся ў бліжэйшым каталіцкім касцёле, дзе місіянерамі былі святар з Італіі і манахіні.

Яны былі з горада Бергама. Заўважылі, што часта сяджу ззаду, і зацікаліся мной. Прытулілі і далі мне любоў, якой я не меў у сям'і. Праз некалькі гадоў я стаў каталіцкім святаром без згоды бацькі і сям'і. Дома мяне праклялі», — казаў госць.


Аднак з цягам часу навярнулася ўся сям'я будучага іерарха, а апошнім — бацька.

«Ён прыйшоў да мяне ў 2004 годзе. Я быў узрушаны, казаў яму, што нават нехрысціянін можа пазбегнуць пекла. Але ён настойваў, што хоча стаць католікам, бо бачыць, што католікі ў нашай краіне жывуць у згодзе і спакоі, ствараюць сем'і, якія нясуць бліжнім шчасце, супольнасці ўзаемнай дапамогі».

Бацька арцыбіскупа ахрысціўся, узяўшы імя Абрагам. Разам з сынам ён заснаваў фонд, у якім разам працуюць католікі і мусульмане.

Паводле wiara.pl (АлГ)

 

Пры выкарыстанні матэрыялаў сайта спасылка на Catholic.By абавязкова.