13 кастрычніка ў базыліцы св. Віта ў Празе (Чэхія) адбылася беатыфікацыя Фрыдрыха Бахштэйна і яго 13 паплечнікаў з Ордэна братоў меншых францішканаў, якія былі забіты ў сваім кляштары 13 лютага 1611 г. Прадстаўніком Святога Айца на цырымоніі быў кардынал Анджэла Амата, прэфект Кангрэгацыі па справах Кананізацыі.

14 францішканаў былі забіты «in odium fidei» (у нянавісці да веры) раз’юшаным натоўпам, які адчуваў безраздумную злосць супраць Касцёла. У той час у Чэхіі была вялікая колькасць розных пратэстанцкіх сектаў, варожых да католікаў і каталіцкай дынастыі Габсбургаў.

Як адзначыў кардынал Амата ў размове з Ватыканскім радыё, у той час «духавенства, законнікі і свецкія вернікі жылі пад пастаяннай пагрозай», аднак «ніхто не мог абвінаваціць францішканаў з пражскага кляштара ў нацыяналізме або палітычнай змове». Крыніцы таго часу «кажуць, што благаслаўлёныя мучанікі цалкам усведамлялі блізкую небяспеку і былі гатовы сустрэць яе як сведкі веры».

Новыя благаслаўлёныя — гэта выхавацель паслушнікаў а. Фрыдрых Бахштэйн з Чэхіі, а. Іаган Марцінэс з Іспаніі, а. Сімон з Францыі, а. Барталамеа Далмадзоні з Італіі, дыякан Джыралама Дэльі Арэзэ з Італіі, субдыякан Гаспарэ Даверыё з Італіі, браты Якуб і Клімент з Германіі, брат Хрыстафор з Галандыі, брат Іаган з Германіі, брат Эмануіл з Чэхіі, брат Джаванні Бадэа з Італіі, брат Антоній з Чэхіі. Перад смерцю з іх сарвалі манаскую вопратку, многія з іх загінулі ў спробе абараніць Найсвяцейшы Сакрамэнт і капліцу Найсвяцейшай Багародзіцы — месца, дзе пазней яны былі пахаваны.

(AG)