З 23 красавіка пры архікатэдральным касцёле Імя Найсвяцейшай Панны Марыі ў Мінску будуць праводзіцца “Вечары для закаханых”. Пачатак у 19.00. Запрашаюцца ўсе пары, якія толькі сустракаюцца, ужо вырашылі ажаніцца або нават пра гэта не думалі.

Як адзначаюць арганізатары, “Вечары для закаханых” – “цудоўная магчымасць распазнаць сваё пакліканне, паглыбіць свае адносіны, а, магчыма, і прыняць рашэнне на будучыню”. У “Вечарах” могуць браць удзел пары закаханых незалежна ад канфесійнай прыналежнасці.

“Вечары для закаханых” - гэта 9 сустрэч, якія доўжацца 2–2,5 гадзіны і праводзяцца адзін раз на тыдзень. У сустрэчах могуць удзельнічаць толькі абое закаханыя. “Вечары” праводзяцца сужэнскай парай і святаром, аніматарамі руху “Сужэнскія сустрэчы”.

Асноўным метадам працы на “Вечарах” з'яўляецца праца закаханых толькі ўдваіх. Штуршком да яе з'яўляюцца ўступы і сведчанні сужэнскіх пар і святароў. Па словах арганізатараў, удзельнікі ў сваіх парах маюць магчымасць глыбейшага азнаямлення са сваімі рысамі асобы, чаканнямі, вызначаюцца з агульнай сістэмай каштоўнасцяў у жыцці, вучацца, як вырашаць праблемы, як будаваць гармонію сваіх адносін; стараюцца зразумець, у чым сутнасць таямніцы шлюбу, адкрываюць месца веры ў сваім жыцці, даведваюцца пра асноўныя палажэнні вучэння Касцёла пра шлюб і сям'ю.

“Вечары” прызначаны як для заручаных, так і для пар, якія сустракаюцца адно з адным без вызначанай даты вяселля, але сур'ёзна думаюць пра шлюб. У праграме могуць удзельнічаць таксама пары закаханых, якія яшчэ не думалі пра шлюб, але жадаюць паглыбіць веды пра сужэнства і сям’ю.

Праграма “Вечароў для закаханых” прапануе:

- навучанне дыялогу - дарозе ўзаемнага пазнання як падчас сустрэч адно з адным, у перыяд заручын, так і на працягу магчымага будучага шлюбнага жыцця
- лепшае пазнанне рыс асобы, чаканняў, планаў, поглядаў, жыццёвых установак людзей, з якімі плануюць звязаць сваё жыццё
- глыбейшае разуменне значэння таямніцы шлюбу і слоў шлюбнай прысягі
- правядзенне аналізу, наколькі планы сумеснага жыцця дакладныя і сталыя.

“Вынікам “Вечароў” з’яўляюцца моцныя сем’і, дзе пануе любоў і згода, дзе сужэнцы слухаюць адно аднаго, дзеляцца сабою, разумеюць сваю другую палавінку і заўсёды гатовыя прабачаць”, - адзначаюць арганізатары.

Кантактныя нумары для запісу:

Павел і Ганна Баярчукі +375 29 770 20 65
Іван і Алена Лубінскія +375 29 556 26 35, +375 29 140 84 56, +375 29 782 14 66