Фільм аргенцінскай вытворчасці «Там, дзе жыве Бог» (у арыгінале Beyond The Sun — «Вышэй за сонца») стаў першай у гісторыі кінастужкай, у якой Папа Рымскі сыграў самога сябе. Прэм’ера фільма ў Польшчы запланавана на 20 красавіка.
Стужка «Там, дзе жыве Бог» абапіраецца на гісторыі з Бібліі і расказвае дзецям пра надзею, веру і адвагу. Хлопчык Эндру ўцякае з дому, каб знайсці пабудаваны ў гарах санктуарый Езуса. Следам за хлопчыкам накіроўваюцца і чацвёра яго школьных сяброў. На шляху іх усіх чакае шмат незабыўных прыгодаў. Шлях дасць ім зразумець, што з Божай дапамогай яны ў сілах супрацьстаяць цяжкасцям.
Упершыню ролю самога сябе ў фільме выканаў Папа Рымскі.
«Наш фільм вырас з жадання папы Францішка, каб у кінематаграфічнай форме расказаць дзецям навіну пра Хрыста», — гаворыць адна з рэжысёраў фільма Грацыэла Радрыгес (Graciela Rodriguez). Пытанне, якое Святому Айцу задаюць у стужцы, гучыць: «Як і дзе дзеці могуць пазнаёміцца з Езусам?» Адказ, які з’явіцца ў кіно, гучыць: «Чытаючы Евангелле, вывучаючы катэхізіс, размаўляючы з Ім».
Прэм’ера стужкі ўжо адбылася ў Ватыкане. Разам з фільмам «Цішыня» Марціна Скарсезэ гэта была адзіная кінастужка такога фармату, паказаная ў Апостальскай Сталіцы ў 2017 годзе.
