Іерархі Касцёла ў Нідэрландах прапануюць штомесяц у дні, якія асаблівым чынам прысвечаны Панне Марыі, маліцца ў інтэнцыі міру. У звароце падкрэсліваецца, што запрашэнне Марыі, якое паходзіць з аб’яўленняў у Фаціме, маліцца Ружанцам у інтэнцыі міру застаецца актуальным заўсёды.
«Молячыся за мір, — чытаем у лісце, апублікаваным галандскімі біскупамі, — мы становімся зброяй Бога». «Таму добрым з’яўляецца і тое, каб вернікі пры гэтым выпадку сустракаліся. Калі гэта немагчыма, то няхай моляцца па аднаму, яднаючыся са шматлікімі іншымі, хто прымае гэты малітоўны намер», — гаворыцца ў звароце.
Біскупы адзначылі, што гэтая ініцыятыва з’яўляецца адказам на словы папы Францішка, які год таму, звяртаючыся да галандскай дэлегацыі, заахвочваў маліцца на ружанцы так часта, як толькі гэта магчыма.
